Բոլիվիայի իշխանությունները հայտարարել են Իսրայելի հետ դիվանագիտական հարաբերությունների խզման մասին՝ Գազայի հատվածում Իսրայելի պաշտպանության բանակի իրականացրած գործողությունների պատճառով։ Այդ մասին հայտնում է Reuters-ը:

Ինչպես մամուլի ասուլիսի ժամանակ հայտարարել է Բոլիվիայի ԱԳ նախարարի տեղակալ Ֆրեդի Մամանին, Բոլիվիան նման որոշում է կայացրել «Գազայի հատվածում իսրայելական ագրեսիվ և անհամաչափ ռազմական հարձակման չընդունմանն ու դատապարտմանն ի նշան»։

Հարավամերիկյան երկու այլ երկրներ՝ Չիլին և Կոլումբիան, հայտարարել են, որ խորհրդակցությունների համար Իսրայելից հետ են կանչել իրենց դեսպաններին: Բոլոր երեք երկրները կոչ են արել հրադադար հայտարարել, իսկ Բոլիվիայի և Չիլիի իշխանությունները հայտարարել են Գազայի հատվածին հումանիտար օգնություն մատակարարելու անհրաժեշտության մասին։ Նրանք նաև Իսրայելին մեղադրել են միջազգային օրենսդրությունը խախտելու մեջ:

Հրադադարի անհրաժեշտության մասին հայտարարել են նաև Մեքսիկայի և Բրազիլիայի իշխանությունները:

Իսրայելի արտաքին քաղաքական գերատեսչությունը Չիլիի և Կոլումբիայի դեսպանների հետկանչը, ինչպես նաև դիվանագիտական հարաբերությունների խզման մասին Բոլիվիայի հայտարարությունը դեռ չի մեկնաբանել:

Reuters-ը նշում է, որ Բոլիվիան աշխարհի առաջին երկրներից է, որը հայտարարել է Գազայի հատվածում գործողությունների պատճառով Իսրայելի հետ դիվանագիտական հարաբերությունների խզման մասին: 2009 թվականին Էվո Մորալեսը, որն այդ ժամանակ զբաղեցնում էր Բոլիվիայի նախագահի պաշտոնը, խզել էր դիվանագիտական հարաբերություններն Իսրայելի հետ՝ Գազայի հատվածին հասցված հարվածների պատճառով, սակայն 2020 թվականին դրանք վերականգնվել էին:

Լուսանկարը՝ AFP-ի