![](/static/articles/16/19/30/l-WXztiAHMUD.jpg)
Լեհաստանի ընդդիմադիր երեք կուսակցությունները կոալիցիա են ստեղծել ու կկարողանան կառավարություն ձևավորել
Լեհաստանի ընդդիմադիր երեք կուսակցությունների՝ «Քաղաքացիական կոալիցիայի», «Երրորդ ուղու» և «Նոր ձախերի» ներկայացուցիչները Սենատում ստորագրել են կոալիցիոն համաձայնագիր։ Այդ մասին հայտնում է լեհական Rzeczpospolita-ն։
Նշվում է, որ կոալիցիոն համաձայնագիրը բաղկացած է 24 կետից և շոշափում է «Իրավունք և արդարություն» կուսակցության կառավարության պատասխանատվության, ԶԼՄ-ների ազատության և իրավունքի գերակայության հարցերը:
Ներկայացվել են նաև Սեյմի և Սենատի խոսնակների պաշտոնների թեկնածուների անունները: Սեյմի խոսնակ կարող է դառնալ «Լեհաստան 2050» կուսակցության առաջնորդ Շիմոն Հոլովնյան։ Վարչապետի պաշտոնում առաջադրվել է «Քաղաքացիական կոալիցիայի» նախագահ Դոնալդ Տուսկի թեկնածությունը: Այժմ արդեն Լեհաստանի նախագահ Անջեյ Դուդան պետք է ընդդիմությանը հանձնարարի ձևավորել նոր կառավարություն։
«Այսուհետ մենք պատրաստ ենք պատասխանատվություն ստանձնել մեր երկրի և առաջիկա տարիների համար»,- մամուլի ասուլիսի ժամանակ հայտարարել է Տուսկը։
Լեհաստանում խորհրդարանական ընտրությունները, որոնք շատերը անվանում էին «երկրի պատմության ամենակարևոր ընտրությունները», կայացել էին հոկտեմբերի 15-ին։
Իշխող «Իրավունք և արդարություն» կուսակցությունը հավաքել էր ձայների 36 %-ից մի փոքր ավելին։ Դա բավարար չեղավ նույնիսկ «Համադաշնություն» կուսակցության հետ ձևավորել կառավարություն, որին աջակցել էր ընտրողների մոտ 8 %-ը։ Ընդդիմադիր երեք կուսակցությունները միասին ստացել էին ձայների գրեթե 54 %-ը։
Ընտրություններին մասնակցել էր ընտրելու իրավունք ունեցող քաղաքացիների շուրջ 73,37 %-ը, ինչը ռեկորդային էր Լեհաստանի համար՝ 1989 թվականից հետո։
Լուսանկարը՝ PAP/Marcin Obara
Մեկնաբանել