Ռուսաստանի նախագահի մամուլի քարտուղար Դմիտրի Պեսկովը, մեկնաբանելով Մինսկում ՀԱՊԿ գագաթնաժողովին մասնակցելուց ՀՀ վարչապետ Նիկոլ Փաշինյանի հրաժարվելը, նշել է, որ եթե դա այդպես է, ապա միայն կարելի է ափսոսանք հայտնել, որովհետև նման հանդիպումները լավ հնարավորություն են հարաբերությունները ճշտելու համար։ Այդ մասին փոխանցում է РИА Новости-ն։

«Եթե դա իրոք այդպես է, ապա կարելի է ափսոսանք հայտնել, մեննք հասկանում ենք, որ յուրաքանչյուր Կառավարության ղեկավար կամ պետության ղեկավար կարող է աշխատանքային գրաֆիկում ունենալ իր միջոցառումները, իր հանգամանքները։ Բայց կարելի է միայն ափսոսանք հայտնել, քանի որ նման հանդիպումները շատ լավ առիթ են կարծիքների փոխանակման, հարաբերությունների ճշտման համար»,- ասել է Պեսկովը՝ պատասխանելով այն հարցին, թե ինչպես են Կրեմլում ընդունում Փաշինյանի որոշումը և ինչպես են գնահատում ՀԱՊԿ կազմից Հայաստանի դուրս գալու հավանականությունը։

Նա ընդգծել է, որ ՀԱՊԿ-ը «շարունակում է պահպանել իր արդիականությունը»։ «Եվ այն հանդիպումները, որոնք կազմակերպվում և անցկացվում են ՀԱՊԿ շրջանակներում, վկայում են դրա մասին, առնվազն մասնակիցների կողմից համապատասխան ոլորտներում փոխգործակցության այս ձևաչափի պահանջված լինելը»,- ասել է Պեսկովը։

Հիշեցնենք, որ այսօր հայտնի դարձավ, որ Նիկոլ Փաշինյանը Մինսկում չի մասնակցի ՀԱՊԿ առաջնորդների գագաթնաժողովին։ Վարչապետի աշխատակազմի տարածած հաղորդագրության մեջ նշվում էր, որ Բելառուսական կողմի նախաձեռնությամբ տեղի է ունեցել վարչապետ Նիկոլ Փաշինյանի հեռախոսազրույցը Բելառուսի նախագահ Ալեքսանդր Լուկաշենկոյի հետ, որի ընթացքում քննարկվել են ՀԱՊԿ Հավաքական անվտանգության խորհրդի՝ նոյեմբերի 23-ին Բելառուսի մայրաքաղաք Մինսկում կայանալիք նիստի կազմակերպման հետ կապված հարցեր:

«Վարչապետ Փաշինյանը Բելառուսի նախագահին տեղեկացրել է, որ չի կարողանա մասնակցել նիստին և հույս հայտնել, որ ՀԱՊԿ գործընկերներն ըմբռնումով կվերաբերվեն այդ որոշմանը»,- ասված էր հաղորդագրության մեջ։

Լուսանկարը՝ РИА Новости-ի