Հունաստանը ողջունում է դեկտեմբերի 7-ին Թուրքիայի նախագահ Ռեջեփ Թայիփ Էրդողանի այցը Աթենք՝ մասնակցելու երկու երկրների համագործակցության խորհրդի նիստին: Այդ մասին հայտարարել է Հունաստանի վարչապետ Կիրիակոս Միցոտակիսը՝ Բեռլինում Գերմանիայի կանցլեր Օլաֆ Շոլցի հետ համատեղ մամուլի ասուլիսի ժամանակ։

Միցոտակիսը վստահություն է հայտնել, որ պաղեստինյան ՀԱՄԱՍ շարժման վերաբերյալ Հունաստանի և Թուրքիայի կարծիքների տարբերությունը չի խանգարի Աթենք Էրդողանի այցին:

«ՀԱՄԱՍ-ը ահաբեկչական կազմակերպություն է, և դրա գործողությունները դատապարտվում են Հունաստանի կառավարության կողմից: Բավական է տեսնել հոկտեմբերի 7-ին Իսրայելի վրա տեղի ունեցած բարբարոսական հարձակման նկարները՝ հասկանալու, թե ինչ նկատի ունեմ։ Բայց այն փաստը, որ մենք համաձայն չենք Էրդողանի հետ ՀԱՄԱՍ-ի դերի հարցում, չի նշանակում, որ մենք չենք կարող նրան ողջունել Աթենքում։ Նրան, ի դեպ, Բեռլինում ընդունելու է նաև կանցլեր Շոլցը։ Դրանով մենք կփորձենք մեկ քայլ առաջ գնալ հույն-թուրքական մերձեցման հարցում, որն իրականում սկսվել է վերջին ամիսներին և որը մինչ այժմ տվել է որոշ կարևոր դրական արդյունքներ»,- հայտարարել է Հունաստանի վարչապետը։

Միցոտակիսը հավաստիացրել է, որ Հունաստանը ձգտում է լավ հարաբերություններ հաստատել Թուրքիայի հետ՝ պահանջելով, որ վերջինս ևս հարգի Հունաստանի իրավունքները: «Եվ մենք կփորձենք օգտագործել այդ առաջընթացը դեկտեմբերի 7-ին նախագահ Էրդողանի այցի միջոցով»,- ասել է հունական կառավարության ղեկավարը:

Աթենքում Հունաստանի և Թուրքիայի համագործակցության բարձր խորհրդի 5-րդ նիստը կկայանա դեկտեմբերի 7-ին: Ավելի վաղ նախատեսվում էր, որ այն տեղի կունենա Սալոնիկում։

Թուրքիան բազմիցս մտահոգություն է հայտնել թուրքական ափերին մոտ գտնվող կղզիներում Հունաստանի սպառազինության վերաբերյալ: Անկարան պնդում է, որ Եգեյան ծովի կղզիները «օկուպացված են հույների կողմից», իսկ «նրանք (թուրքերը-խմբ.) կարող են հանկարծակի գալ գիշերը և ներխուժել այդ կղզիներ»։ Ի պատասխան՝ Հունաստանի ԱԳՆ-ն ընդգծել էր, որ հունական կղզիների դիմաց տեղակայված են «Եվրոպայում ամենամեծ դեսանտային նավատորմը և թուրքական մի ամբողջ բանակ»։ Վերջին ամիսներին, սակայն, երկու երկրների միջև հարաբերությունները որոշակիորեն լավացել են, իսկ լարվածությունը՝ թուլացել։

Լուսանկարը՝ Reuters գործակալության