«Ցայգ» հայկական ֆոլկ-ռոք խմբի ստեղծման 4-ամյակի առիթով Երևանի Հովհաննես Թումանյանի անվան պետական տիկնիկային թատրոնում համերգ էր կազմակերպվել:

«Ցայգի» երգացանկը հիմնականում կազմված է հայկական ժողովրդական երգերի յուրօրինակ մշակումներից՝ պրոգրեսիվ ռոքի, նեոֆոլկի և այլ ոճերի միջակայքում: Ինչպես նշում է խմբի ղեկավար Արթուր Աթայանը, երգերի մեծ մասը մեզ հասել է Կոմիտասից և Հայրիկ Մուրադյանից, սակայն «Ցայգի» մշակումներում դրանք բազմաձայն են և երբեմն փոփոխված ռիթմերով: 

Համերգի հատուկ հյուրերն էին Մերի Շուշանյանը («DifFusion Band»), Մհեր Մանուկյանը («Լավ Էլի»), Արմեն Եդիգարյանը («Rozen Tal»):

«Ցայգը» հիմնադրվել է 2019 թվականին «Արեգնազան» կրթահամալիրում՝ ավագ դպրոցի աշակերտների մասնակցությամբ և Արթուր Աթայանի ղեկավարությամբ: