Հայաստանի ամերիկյան համալսարանն ու NVIDIA ընկերությունը հայերենի ձայնային բազայի հարստացման մրցույթ են հայտարարել
Հայերեն խոսքից տեքստ տվյալների բազան հարստացնելու նպատակով դեկտեմբերի 1-4-ը Հայաստանի ամերիկյան համալսարանի Ակեան բնագիտության և ճարտարագիտության քոլեջը և NVIDIA կազմակերպությունը նախաձեռնում են մրցույթ:
Ակեան բնագիտության և ճարտարագիտության քոլեջի փոխանցմամբ՝ հայերենն ունի ձայնային տվյալների 5-ժամյա բազա, որն անհամեմատ քիչ է անգլերենի 3400-ժամյա և վրացերենի 145-ժամյա առկա տվյալների համեմատ:
«Յուրաքանչյուր անձ կկարողանա իր ներդրումն ունենալ բազան հարստացնելու գործում՝ օրական տրամադրելով ընդամենը 5 րոպե: Մասնակցելու համար անհրաժեշտ է․
1) Գրանցվել Mozilla Common Voice կայքում,
2) Առցանց կատարել հայերեն լեզվով ձայնագրման և վավերացման առաջադրանքներ,
3) Ուղարկել արդյունքների էջի նկարը մինչև դեկտեմբերի 4-ը, 08:00-ն։
Մասնակիցները հնարավորություն կունենան շահելու NVIDIA կազմակերպության կողմից պատրաստված նվերներից մեկը»,- ասված է հաղորդագրության մեջ։
Մանրամասները՝ տեսանյութում։
Մեկնաբանել