Իսրայելցի պաշտոնյաները հոկտեմբերյան հարձակումից ավելի քան մեկ տարի առաջ փաստաթղթեր էին ստացել պաղեստինյան ՀԱՄԱՍ արմատական շարժման՝ Իսրայելի տարածք ներթափանցելու ծրագրերի մասին, սակայն դրանց լուրջ չեն վերաբերել՝ համարելով չափազանց հավակնոտ: Այդ մասին հայտնել է The New York Times-ը՝ հղում անելով իր տրամադրության տակ առկա փաստաթղթերին և իսրայելցի պաշտոնյաների էլեկտրոնային նամակներին։

Պարբերականի տվյալներով՝ ՀԱՄԱՍ-ի պլանների մասին 40 էջանոց փաստաթղթում գործողության իրականացման ճշգրիտ ամսաթիվ չի եղել, սակայն նկարագրվել են իսրայելական բոլոր ամրությունները, զինված ուժերի տեղակայման վայրերն ու թվաքանակը: Իսրայելցի վերլուծաբանները համարել են, որ նման գործողության մասշտաբները դուրս են ՀԱՄԱՍ-ի հնարավորությունների շրջանակներից, և պլանը հավակնոտ են անվանել:

Պարբերականը նշում է, որ պաղեստինյան շարժումն այդ ծրագրին հետևել է «զարմանալի ճշգրտությամբ»: Պաշտոնյաները խոստովանել են, որ եթե լուրջ վերաբերեին այդ փաստաթղթին, Իսրայելը կարող էր պատրաստվել կամ խուսափել հոկտեմբերի 7-ին ՀԱՄԱՍ-ի զինյալների ներթափանցումից։

Հոկտեմբերի 14-ին Հրեական պետության ազգային անվտանգության խորհրդի ղեկավար Ցախի Հանեգբին նույնպես խոստովանել էր, որ Իսրայելը ձախողել է Գազայի հատվածից հոկտեմբերի 7-ին պաղեստինյան ՀԱՄԱՍ շարժման զինված գրոհայինների հարձակումը կանխելու առաքելությունը: Սակայն միևնույն ժամանակ Հանեգբին պարզաբանել էր, որ Իսրայելը կոնկրետ նախազգուշացում չի ստացել ՀԱՄԱՍ-ի կողմից նախապատրաստվող հարձակման մասին, այդ թվում՝ Եգիպտոսից: Նա հավելել էր, որ հոկտեմբերի 7-ին՝ հարձակումից երկուսուկես ժամ առաջ, Իսրայելի ընդհանուր անվտանգության ծառայության ղեկավարը կանչվել է արտակարգ քննարկման՝ նոր հետախուզական տեղեկատվության վերաբերյալ, բայց դա չի հանգեցրել զորահավաքի:

Լուսանկարը՝ Times of Israel-ից