Դեկտեմբերի 2-ի երեկոյան Փարիզի Գրենելի առափնյա շրջանում տղամարդը դանակով հարձակվել է անցորդների վրա։ Հարձակման հետևանքով մեկ մարդ զոհվել է, ևս երկուսը ստացել տարբեր աստիճանի մարմնական վնասվածքներ։ Այդ մասին հայտնել է Ֆրանսիայի ներքին գործերի նախարար Ժերալդ Դարմանենը։ 

https://t.co/S1YFUKjyxu pic.twitter.com/05RQ9OrMBj

— Gérald DARMANIN (@GDarmanin) December 2, 2023

Հարձակում գործած անձը ձերբակալվել է։ Ներքին գործերի նախարարի խոսքով՝ ձերբակալությունից առաջ տղամարդը վանկարկել է. «Ալլահու աքբար»։ Նախարարը հայտարարել է, որ հարձակվողը տառապում էր հոգեկան խանգարումներով և բուժում էր ստանում։ Նա ոստիկանությանը հայտնի էր որպես արմատական իսլամի կողմնակից:

Le Figaro-ի տվյալներով՝ տղամարդը հայտարարել է, որ դեմ է հանդես գալիս Պաղեստինում մուսուլմանների սպանությանը, ինչպես նաև Ֆրանսիային անվանել էր Իսրայելի «հանցակից»։

Պարբերականը գրում է, որ ձերբակալվածը ծնվել է 1997 թվականին Ֆրանսիայում։ 2016 թվականի հուլիսին նրան ձերբակալել էին՝ հարձակումներ իրականացնելու պլանների կասկածանքով։ Նույն թվականին նա դատապարտվել էր 4 տարվա ազատազրկման։

Ֆրանսիայի ներքին գործերի նախարարը նաև հայտարարել է, որ զոհվածը Գերմանիայի քաղաքացի է։

Լուսանկարը՝ Stephanie Lecocq/Reuters