Օրեր առաջ մահացած Աշոտ Մխիթարյանի հարազատները թաղման հաջորդ օրը նրա գերեզմանը հայտնաբերել են թալանված․ գողացել են 29 ծաղկեպսակներն ու մի քանի տասնյակ ծաղկեփնջերը:

Հուղարկավորությունը եղել է Շենգավիթի «Կարմիր բլուր» կոչվող գերեզմանատանը: Ա. Մխիթարյանի քույրը՝ Դուստրիկ Մխիթարյանը, «Հետք»-ին ասաց, որ կրկնակի ցավ են ապրել, երբ այցելել են եղբոր գերեզմանին և տեսել այն թալանված: Տարածքում միայն մնացել էին ծաղիկների տերևներն ու դրանց կոտրված մասերը:

Դուստրիկ Մխիթարյանն ասաց՝ ամենայն հավանականությամբ, ծաղկեպսակներն ու ծաղիկները գողացել են դեկտեմբերի 9-ի գիշերը, քանի որ թաղումը եղել է դեկտեմբերի 8-ին: Իսկ թաղման հաջորդ օրը հողաթումբն ամբողջությամբ դատարկ էր:

Պարզվում է՝ առաջին դեպքը չէ, երբ Երևանում հարազատները գերեզմանները հայտնաբերում են թալանված: «Կարմիր բլուր» կոչվող գերեզմանատանն աշխատողները Ա. Մխիթարյանի հարազատներին պատմել են, որ նմանատիպ դեպքեր էլի են լսել: Նույնիսկ զինվորականների գերեզմանների ծաղիկներն են գողացել:

Դուստրիկ Մխիթարյանն ասաց, որ դիմել են ոստիկանություն՝ հույս ունենալով գտնել արարքը կատարողներին: Նշեց, որ նպատակը հետագայում նմանատիպ դեպքերը կանխելն է, քանի որ շիրիմներն այդ ձևով պղծելը դեմ է մեր արժեքներին:

Ոստիկանությունից մեզ հայտնեցին, որ գերեզմանատների գողությունների դեպքով առանձին վիճակագրություն չեն վարում, հետևաբար՝ առանձին տվյալներ դուրս հանելու համար ժամանակ է պետք:

Երևանում գործում է 21 գերեզմանատուն: Այն սպասարկող Երևանի քաղաքապետարանի «Բնակչության հատուկ սպասարկում» ՀՈԱԿ-ի տնօրեն Հրաչյա Նազարյանը մեզ հետ զրույցում ասաց, որ Երևանի գերեզմանատների ընդհանուր տարածքը կազմում է մոտ 550 հա: Ամեն գերեզմանատանը կա 2 հսկիչ, 1 վարիչ և 3-4 բանվոր"

«Ֆիզիկապես նման ահռելի տարածքը վերահսկել հնարավոր չէ: Գերեզմանատները պարսպապատված չեն, ավտոմեքենաների համար մի քանի մուտք կա, որը անհնար է վերահսկելը: Մեր աշխատանքային ժամը մինչև 18:00-ն է, դրանից հետո գերեզմանատներում որևէ մեկը չի լինում: Հաստիքով պահակ էլ նախատեսված չէ»,- ասաց Հրաչյա Նազարյանը:

ՀՈԱԿ-ի տնօրենի խոսքով՝ գերեզմանատներից կատարվող գողությունները հաճախակի են դարձել հատկապես նոյեմբեր-դեկտեմբեր ամիսներին, ու վերահսկելն անհնար է: Հ. Նազարյանի համար պարզ չէ, թե որն է պատճառը, սակայն նմանատիպ դեպքերն ավելանում են հատկապես ձմռան ամիսներին:

Հետաքրքրվեցինք, թե այդ դեպքում ի՞նչ քայլեր է ձեռնարկում Երևանի քաղաքապետարանը, երբ գերեզմաններից կատարվող գողությունների դեպքերն ավելանում են:

«Նման դեպքեր, երբ մեր կողմից հայտնաբերվում են, դիմում ենք իրավապահ մարմիններին կամ հորդորում ենք, որ քաղաքացիները դիմեն իրավապահներին: Վերջին երկու ամսվա ընթացքում արդեն 4-5 ահազանգ ենք ստացել գերեզմանատներից»,- նշում է ՀՈԱԿ-ի տնօրենը:

Հրաչյա Նազարյանն ասաց, որ լուծումը տարածքի պարսպապատումն է: Նրա խոսքով՝ այժմ քաղաքապետարանում նախագիծ է պատրաստվում, որպեսզի Զեյթունի և Շենգավիթի «Կարմիր բլուր» գերեզմանատները պարսպապատվեն: Դրանից հետո մեքենաների համար կլինի 1-2 մուտք, որպեսզի չկարողանան գողանալ նաև գերեզմանաքարերը: Պարզվում է՝ նաև նման դեպքեր են գրանցվում:

Պարսպապատումից հետո միայն հնարավոր կլինի տեսախցիկներ տեղադրել ու վերահսկել իրավիճակը:

«Իսկ ծաղիկների ու ծաղկեպսակների գողությունը անհնար է վերահսկել, քանի որ դրանք հնարավոր է ոտքի ճանապարհով էլ տանել»,- հավելեց «Բնակչության հատուկ սպասարկում» ՀՈԱԿ-ի տնօրենը:

Թե երբ պարսպապատման ծրագիրը իրականություն կդառնա, դժվար է ասել: Իսկ այս ընթացքում հարազատները կամ ստիպված պետք է գերեզմանատներում պահակություն անեն, որ գողության դեպքեր չգրանցվեն, կամ հուսան, որ գողերը կշրջանցեն իրենց հարազատի շիրիմը:

Լուսանկարները տրամադրել են Աշոտ Մխիթարյանի հարազատները։