Ամերիկյան վարչակազմը 2024 թվականի հունվարից կկորցնի Ուկրաինային սպառազինության նոր փաթեթների տրամադրման հնարավորությունը, եթե Կոնգրեսը հրաժարվի այդ նպատակների համար լրացուցիչ բյուջետային հատկացումներ իրականացնել։ Այդ մասին հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։

Նրա խոսքով՝ արդեն դեկտեմբերի վերջին ԱՄՆ-ն այլևս չի կարողանա ռեսուրսներ հավաքել Ուկրաինա կրիտիկական կարևոր նշանակություն ունեցող սպառազինության ուղարկման համար, եթե կոնգրեսականները հավանություն չտան ԱՄՆ նախագահ Ջո Բայդենի վարչակազմի՝ Կոնգրեսին ներկայացված հատկացումների հայտերին:

«Այսպիսով, մենք այլևս միջոցներ չենք ունենա հունվարից Ուկրաինա զենք ուղարկելու, իսկ հետո նաև մեր սեփական պաշարները համալրելու համար»,- ասել է ԱՄՆ նախագահի խորհրդականը՝ Վաշինգտոնում հանդես գալով The Wall Street Journal պարբերականի կազմակերպած համաժողովին։

Լուսանկարը՝ Sergei Supinsky / AFP via Getty Images file