Ուկրաինայի նախագահ Վլադիմիր Զելենսկին հայտարարել է, որ չգիտի, թե երբ կավարտվի Ռուսաստանի հետ պատերազմը: Այդ մասին նա հայտարարել է տարեվերջյան մամուլի ասուլիսի ժամանակ։

«РБК-Украина»-ի լրագրողը Զելենսկիին հարցրել է, թե արդյոք վերջինս համաձայն է արևմտյան առաջնորդների այն տեսակետին, որ պատերազմը կարող է դեռ շատ երկար ձգվել ու չավարտվել 2024 թվականին։ 

«Ես կարծում եմ, որ պատասխանը ոչ ոք չգիտի, նույնիսկ մեր հրամանատարները կամ արևմտյան գործընկերները։ Նրանք չգիտեն։ Դրանք միայն մտքեր են, և մտքերը հաճախ տարբերվում են իրականությունից»,- ասել է Ուկրաինայի նախագահը։ 

Զելենսկին նաև հիշեցրել է այն կանխատեսումները, որ ռուսական զորքերը երեք օրվա ընթացքում կգրավեին Կիևը:

«Դրանք ևս մտքեր էին։ Ես ուզում եմ կոռեկտ լինել։ Պատերազմը, հաղթանակը, պարտությունը, լճացումը կախված են շատ որոշումներից, շատ ռիսկերից, շատ ուղղություններից, բայց հիմնականում մեզնից և ձեզանից: Եթե չկորցնենք մեր տոկունությունը, ապա ավելի շուտ կավարտենք պատերազմը։ Մենք պատրաստ չենք տալ մեր երկիրը»,- հավելել է Ուկրաինայի առաջնորդը։

Լուսանկարը՝ Alamy-ից