![](/static/articles/01/63/24/l-hVtUbNa8kV.jpg)
«Հայկական ժամանակ». նախագահի խնամին չի բացառել ռեկտոր դառնալու հնարավորությունը
Համառ լուրեր են շրջում այն մասին, որ Երեւանի Մխիթար հերացու անվան պետական բժշկական համալսարանի ռեկտոր է դառնալու Երեւանի «Սուրբ Գրիգոր Լուսավորիչ» բժշկական կենտրոնի ղեկավար, Սերժ Սարգսյանի խնամի Արա Մինասյանը:
Թերթի թղթակցի հետ զրույցում Մինասյանը երեկ չի բացառել այդ հնարավորությունը: «Դեռ չեմ կողմնորոշվել: Մի քանի հարցեր կան հիվանդանոցի հետ կապված՝ հետագա զարգացման եւ այլն, որ չի լինի թողնել, դրա համար դժվար է այդ հարցին պատասխանել»,- ասել է նա: Ճշտող հարցին, որ ամեն դեպքում չի բացառում ու մտածու՞մ է այդ ուղղությամբ, Արա Մինասյանը պատասխանել է. «Չէ, չեմ մտածում, բայց չի բացառվում»: Երկու աշխատանքը համատեղել, ըստ բուժկենտրոնի ղեկավարի, ծանր եւ անհնար կլինի:
Մինասյանն, ի դեպ, այժմ բժշկական համալսարանի խորհրդի անդամ է: Բուհի ռեկտորի պաշտոնը թափուր է մնացել, քանի Դերենիկ Դումանյանը նշանակվել է առողջապահության նախարար: ԿԳ նախարար Արմեն Աշոտյանն էլ օրերս հայտարարել է, որ թափուր պաշտոնի մրցույթ, ըստ ամենայնի, կհայտարարվի ամռան վերջին:
Մեկնաբանել