![](/static/articles/16/32/80/l-E7CfE7KNMw.jpg)
Ուկրաինան դարձյալ հարձակվել է Ռուսաստանի Բելգորոդի մարզի վրա. կա 2 տուժած
Ռուսական հակաօդային պաշտպանության ուժերը Բելգորոդ քաղաքի և Բելգորոդի շրջանի օդային տարածքում օդային 10 թիրախ են խոցել։ Այդ մասին հայտարարել է Բելգորոդի նահանգապետ Վյաչեսլավ Գլադկովը։ Նախնական տվյալներով՝ կա 2 տուժած։
Գլադկովի խոսքով՝ տուժածներից մեկի մոտ նախաբազկի բեկորային վնասվածք է, երկրորդի մոտ՝ սրունքի բեկորային վնասվածք: Երկուսն էլ տեղափոխվել են հիվանդանոց:
Գլադկովը հայտնել է, որ արկի պայթյունի հետևանքով կոտրվել են քաղաքի բնակելի շենքերից մեկի մի քանի բնակարանների լուսամուտները։ Վնասվել է նաև ավելի քան 30 մեքենա։
Բելգորոդի քաղաքապետ Վալենտին Դեմիդովը պայթյունի վայրից հրապարակել է կադրեր և նշել, որ քաղաքի արևելյան փողոցներից մեկում վնասվել է բնակելի շենքերից մեկի 130 լուսամուտ։
ՌԴ ՊՆ հայտարարության մեջ, որը մեջբերում են TACC-ն ու РИА Новости-ն, նշվում է, որ ռուսական ՀՕՊ ուժերը Մոսկվայի ժամանակով մոտ 23:40-ին (Երևանի ժամանակով՝ 00:40-ին) Բելգորոդի մարզի տարածքում խոցել են «Ольха» տեսակի 10 հրթիռ։
Հարձակումից որոշ ժամանակ առաջ Գլադկովը բնակիչներին նախազգուշացրել էր քաղաքում օդային տագնապի ազդանշանի գործարկման մասին։
Լուսանկարը՝ Yevgeny Silantyev/TASS
Մեկնաբանել