![](/static/articles/16/32/83/l-ngDdWorelp.jpg)
Էնթոնի Բլինքենը Թուրքիայում կքննարկի Գազայի հատվածում առկա իրավիճակը
ԱՄՆ պետքարտուղար Էնթոնի Բլինքենը Թուրքիա կատարելիք այցի շրջանակներում խորհրդակցություններ կանցկացնի Գազայի հատվածում տիրող իրավիճակի և ընդհանրապես պաղեստինյան հակամարտության շուրջ: Այդ մասին Haberturk հեռուստաընկերության եթերում հայտարարել է Թուրքիայի իշխող Արդարություն և զարգացում կուսակցության պաշտոնական ներկայացուցիչ Օմեր Չելիքը։
«Անհրաժեշտ է շարունակել սերտ խորհրդակցությունները Գազայի հարցերի շուրջ։ Իրավիճակն այնտեղ վատանում է, պատերազմը ձգձգվում է։ Այնտեղ շատ հարցեր կան, որոնք պետք է մանրամասն քննարկել։ Եվ իհարկե, Թուրքիան ԱՄՆ Պետքարտուղարության ղեկավարի համար այն երկիրն է, որտեղ պետք է հաճախ այցելել այդ հարցերը քննարկելու համար։ Ես դա նկատել եմ դեռ ռուս-ուկրաինական հակամարտության իրավիճակում։ Գերմանիան, ԵՄ-ն, բացի ռազմական բաղադրիչի ուղղակի գնահատումից, չկարողացան ստեղծել աշխատանքային և ամուր դիվանագիտական մեխանիզմ։ Նրանք պետք է կապի այդպիսի գիծ ստեղծեին մեր նախագահի հետ»,- ասել է Չելիքը։
Նրա խոսքով՝ Իսրայելի ու Գազայի հակամարտության պայմաններում անհրաժեշտ է դիվանագիտական կապեր ստեղծել Թուրքիայի ղեկավարության հետ՝ որպես երկրի, որը կարող է շփվել հակամարտող երկու կողմերի հետ: «Ցավոք, այժմ և՛ ԱՄՆ-ն, և՛ ԵՄ-ն չեն կարող դիվանագիտական բավարար լիազորություններ ցուցաբերել ընթացիկ ճգնաժամերի պայմաններում»,- հայտարարել է թուրք քաղաքական գործիչը։
Ինչպես փոխանցում է CNN Turk-ը, Բլինքենը Թուրքիա կայցելի այսօր երեկոյան: Նա դեկտեմբերի 6-ին կհանդիպի Թուրքիայի արտաքին գործերի նախարար Հաքան Ֆիդանի հետ և, հնարավոր է, հանդիպի նաև նախագահ Ռեջեփ Թայիփ Էրդողանի հետ: Ենթադրվում է, որ կողմերը կքննարկեն նաև ՆԱՏՕ-ին Շվեդիայի անդամակցության հարցը, Թուրքիային F-16 կործանիչների վաճառքը, Եգեյան ծովում ուժերի հավասարակշռության խախտման և ռազմական ներկայության խնդիրները:
Լուսանկարը՝ Greg Nash/The Hill
Մեկնաբանել