Էստոնիայի իշխանությունները որոշել են մինչև 2027 թվականը Ուկրաինային 1,2 միլիարդ եվրոյի ռազմական օգնության փաթեթ տրամադրել։ Այդ մասին Տալլինում Ուկրաինայի նախագահ Վլադիմիր Զելենսկիի հետ համատեղ մամուլի ասուլիսի ժամանակ հայտարարել է Էստոնիայի նախագահ Ալար Կարիսը։

«Ուկրաինային աջակցությունը պետք է շարունակվի։ Մինչև 2027 թվականը Էստոնիայի երկարաժամկետ ներդրումը կկազմի 1,2 միլիարդ եվրո»,- ասել է նա։ Կարիսը հավելել է, որ Կիևին անհրաժեշտ են լավագույն սպառազինությունները, ուստի ԵՄ երկրները պետք է ավելացնեն ռազմական արտադրությունը:

Ավելի վաղ Էստոնիայի վարչապետ Կայա Կալասը հայտնել էր, որ գալիք չորս տարիների ընթացքում Ուկրաինային կտրամադրեն Էստոնիայի ՀՆԱ-ի 0,25 %-ի չափով ռազմական օգնություն։ Էստոնական ERR պետական հեռուստառադիոընկերության տվյալներով՝ 2022 թվականից Էստոնիան Ուկրաինային արդեն իսկ տրամադրել է գրեթե 500 միլիոն եվրոյի ռազմական օգնություն։

Լուսանկարը՝ Getty Images-ի