![](/static/articles/16/34/66/l-hXJhDsEYoK.jpg)
Ֆրանսիան Ադրբեջանից պահանջում է ազատ արձակել իր քաղաքացուն
Ֆրանսիան Ադրբեջանին մեղադրել է իր քաղաքացուն կամայական ձերբակալելու մեջ և պահանջում է անհապաղ ազատ արձակել նրան: Զուգահեռաբար, Ֆրանսիայում Ադրբեջանի դեսպան Լեյլա Աբդուլաևան հայտարարել է, որ խոսքը գնում է այն մարդու մասին, որը դեկտեմբերի 4-ին ձերբակալվել է լրտեսության մեղադրանքով։
Ֆրանսիայի ԱԳՆ-ն Reuters-ին ուղղված իր հայտարարության մեջ հաստատել է, որ Բաքվի կողմից ձերբակալվածը Ֆրանսիայի քաղաքացի Մարտին Ռայանն է։
«Մենք սերտ կապի մեջ ենք նրա ընտանիքի հետ, և Բաքվում Ֆրանսիայի դեսպանատունը կարողացել է երկու անգամ այցելել մեր հայրենակցին՝ հյուպատոսական պաշտպանության շրջանակներում»,- հայտարարել է գերատեսչությունը։
Ֆրանսիական կողմի հայտարարության մեջ նշվում է, որ Փարիզը Ռայանի ձերբակալությունը համարում է կամայական և պահանջում անհապաղ ազատ արձակել նրան:
Ֆրանսիական TF1-ը նշում է, որ ֆրանսիացի գործարար Մարտին Ռայանը մշտապես աչքի է ընկել իր ադրբեջանամետ դիրքորոշմամբ։ Ռայանը, որը մասնագիտացած է Ադրբեջանում սննդի ներմուծման ոլորտում, 2021 թվականի մայիսի 17-ին բաց նամակ էր հղել Ֆրանսիայի նախագահ Էմանուել Մակրոնին՝ կոչ անելով «վճռական գործողություններ» ձեռնարկել ֆրանս-ադրբեջանական հարաբերությունների կարգավորման ուղղությամբ։
Բաքուն պնդում է, թե, իբր, Ռայանը լրտեսական գործողություններ է իրականացրել Ադրբեջանի տարածքում ու տեղեկատվությունը փոխանցել Փարիզին։
Լուսանկարը՝ AFP-ի
Մեկնաբանել