Այսօր Երևանում շտապօգնության բժշկին ծեծի ենթարկած քաղաքացիները ձերբակալվել են։ Այս մասին հայտնում է ՀՀ ոստիկանությունը։

«Հունվարի 13-ին՝ ժամը 9։40-ին, ՆԳՆ ոստիկանություն զանգահարած քաղաքացին հայտնել է, որ 16 թաղամասի շենքերից մեկի բնակարանում վիճաբանության ձայներ են, հարձակվել են շտապօգնության բժշկի վրա։ 10։35-ին հաղորդում է ստացվել նաև «Արմենիա բժշկական կենտրոնից։ Ոստիկանությանը հայտնել են, որ իրենց մոտ մարմնական վնասվածքներով բուժօգնության է տեղափոխվել շտապօգնության ենթակայանի բժիշկներից մեկը։

Ոստիկանության Մաշտոցի բաժնի ծառայողների անհետաձգելի միջոցառումներով պարզվել է, որ նույն օրը շտապօգնության խումբը կանչով մեկնել է Նորաշեն թաղամասի շենքերից մեկի բնակարան, որտեղ տվյալ հասցեի բնակիչները դեղորայքի ներարկման հետ կապված վիճաբանել են բժշկի հետ, ինչի ընթացքում հարվածներ են հասցրել նրան՝ պատճառելով մարմնական վնասվածքներ։ 23 և 24-ամյա եղբայրները մարմնական վնասվածքներ պատճառելու հիմնավոր կասկածանքով ձերբակալվել են ու ներկայացվել նախաքննական մարմնին»,- ասված է Ոստիկանության տարածած հաղորդագրության մեջ։

Ավելի վաղ Առողջապահության նախարար Անահիտ Ավանեսյանն իր ֆեյսբուքյան էջում գրել էր, որ Երևանում բռնության դեպք է տեղի ունեցել շտապօգնության բժշկի նկատմամբ։

Դեպքի առթիվ մանրամասներ էր հայտնել Երևանի քաղաքապետի մամուլի քարտուղար Հայկ Կոստանյանը։

«Բժշկի հասցեին հնչել են հայհոյանքներ, որից հետո վերջինիս 3 անձինք ծեծի են ենթարկել։ Ավելի ուշ բուժօգնության դիմած բժշկի մոտ ախտորոշվել է ուղեղի ցնցում, քթի սալջարդ, դեմքի շրջանում քերծվածքներ»,- գրել էր Կոստանյանը։