Քիչ առաջ բախում է տեղի ունեցել «Հարսնաքար» ռեստորանի մոտ, որտեղ հավաքվել էին Ռուբեն Հայրապետյանի թիկնապահների կողմից ծեծի ենթարկված եւ հիվանդանոցում մահացած ռազմական բժիշկ Վահե Ավետյանի յոթնօրեքը հարգող քաղաքացիներ: Ոստիկանները եւ կարմիրբերետավորները շրջափակել են ռեստորանային համալիրը՝ արգելելով մարդկանց մոտենալ դրա տարածքին, ինչից հետո մոմավառության մասնակիցների եւ ուժայինների միջեւ բախում է տեղի ունեցել:

Իրարանցմանը միջամտել է Երեւանի փոխոստիկանապետ Ռոբերտ Մելքոնյանը, որի գլխավորությամբ ոստիկանները սկսել են քաշքշել քաղաքացիներին: Վերջիններս դուրս են եկել հարակից Աճառյան փողոց ու փակել այն: Բախման արդյունքում ուժայինները ժողովրդին բաժանել են երկու հատվածի:

Այս պահին փողոցի երկու մայթերով մարդիկ քայլում են դեպի քաղաք: Նրանց միջեւ ոստիկաններն են, որոնք քայլում են մայթեզրերին զուգահեռ:    

23:00-Այս պահին ցուցարարները շարժվում են Ավանում գտնվող Ռուբեն Հայրապետյանի տան ուղղությամբ: Նշենք, որ բախման ժամանակ ռեստորանի տարածքում է եղել նաեւ Հայրապետյանը: 

Ըստ շրջանառվող լուրերի՝ ակցիայի ժամանակ ռեստորանի տարածքում Հայրապետյանը հարվածել է իրավապաշտպան Արման Վեզիրյանին: Այս դրվագը մեծ աղմուկ ու վրդովմունք է առաջացրել մասնավորապես համացանցում:

23:20- Ռուբեն Հայրապետյանի տան դիմաց ելույթներ ունենալուց հետո ցուցարարները կրկին շարժվում են «Հարսնաքարի» ուղղությամբ: Օլիգարխի տունը ոստիկանների աչալուրջ հսկողության տակ է: 

23:43- Հայրապետյանի առանձնատնից դեպի «Հարսնաքար» շարժվող բազմությունը քաղաքապետ Տարոն Մարգարյանի տան մոտով անցնելիս սկսել է բացականչել. «Տա-րոն, գեղեցիկ չէ..»: Այս խոսքերի հեղինակը Սերժ Սարգսյանն է, որը Մաշտոցի պուրակի տաղավարների ապամոնտաժման մասին խոսելիս նման արտահայտություն էր արել: 

00:05- Ռեստորանի մոտ վերադարձած բազմությունը կրկին վանկարկում էր «Նեմեց մարդասպան»: Քիչ անց բազմությունը հեռացավ տարածքից: Ցույցն ավարտվեց: 

Լուսանկարները՝ Սարո Բաղդասարյանի