Ռուսաստանի պաշտպանության նախարարությունը հայտարարել է, որ հունվարի 18-ի գիշերը Լենինգրադի մարզի տարածքում անօդաչու է խոցվել։ Այս մարզում անօդաչուի խոցման մասին ռուսական իշխանությունները հայտնում են Ուկրաինա ներխուժումից ի վեր առաջին անգամ։ 

Ինչպես հայտարարել է ռուսական պաշտպանական գերատեսչությունը, գիշերը Մոսկվայի ժամանակով մոտ 01:30-ին (Երևանի ժամանակով՝ 02:30-ին) հակաօդային պաշտպանության ուժերը ևս մեկ անօդաչու են խոցել Մոսկվայի մարզի տարածքում։ Մոսկվայի քաղաքապետ Սերգեյ Սոբյանինը հայտարարել է, որ անօդաչուն խոցվել է Պոդոլսկ քաղաքի շրջանում։

Նախնական տվյալներով՝ ավերածություններ և տուժածներ չկան։ Լենինգրադի մարզի իշխանությունները հարձակման հետևանքների մասին տեղեկությունը դեռ չեն մեկնաբանել։

Հունվարի 17-ի երեկոյան ՌԴ ՊՆ-ն հայտարարել էր, որ ՀՕՊ ուժերը ոչնչացրել են «Точка-У» համալիրի երկու հրթիռ և Բրյանսկի մարզի տարածքում վնասազերծել երեք անօդաչու։ Նահանգապետ Ալեքսանդր Բոգոմազի տվյալներով՝ հարձակման հետևանքով տուժածներ չկան։ Վնասվել է բնակելի մեկ տուն, իսկ արդյունաբերական ձեռնարկություններից մեկի տարածքում գտնվող շենքերից մեկում մասամբ վնասվել են լուսամուտների ապակիները։ 

Բելգորոդի մարզի ղեկավար Վյաչեսլավ Գլադկովը հունվարի 18-ի առավոտյան հայտնել է, որ ռուսական հակաօդային պաշտպանության ուժերը մարզի տարածքում գիշերը խոցել են 10 հրթիռ։ Նախնական տվյալներով, որը նա ներկայացրել է տելեգրամյան իր ալիքում, տուժածներ չկան։ 

Նահանգապետը նշել է, որ Բելգորորդ քաղաքի շրջանում մասնավոր տներից մեկի վնասված լուսամուտները չհաշված, ավերածությունների մասին տվյալներ չեն ստացվել։

Լուսանկարը՝ building-tech.org-ից