Սևանա լճի շրջանում ապրողներն ու այցելուները շուտով ականատես կլինեն մի հետաքրքիր շինության… Հավատարիմ պատմական, մշակութային և բնական ժառանգության պահպանման սկզբունքներին, ինչպես նաև Հայաստանում ժամանակակից արվեստի տարածմանը՝ «Սևակ» միությունը և Շվեցարիայում բնակվող հայազգի արվեստագետ Ալինա Մնացականյանը 2011թ. հոկտեմբերին սկսել են մի նախագիծ, որը միավորում է և արվեստը և ուսուցումը:

«Մեր կիկլոպյան պատերը»

Նպատակն է հասարակության ուշադրությանը ներկայացնել Հայաստանի պատմական ժառանգության կարևորությունը, ինչպես նաև երկրի ներկա բնապահպանական իրավիճակը և գալիք սերունդներին սպասվող ապագան:

Ընդհանուր նախագիծը

Օրինակ ունենալով Լճաշեն գյուղի մոտ գտնվող 4-5 հազարամյա կիկլոպյան պատերը՝ մոտ ապագայում շրջանում հավաքված աղբից ստեղծվելու են նմանատիպ պատեր: Այս արվեստի գործը, որի կառուցմանը սատարելու են նաև տեղի բնակիչները, առիթ է դառնալու բնապահպանական հարցերի արծարծմանը և ուսուցմանը։

Նախապատրաստական փուլը սկսվել է 2011 թ. հոկտեմբերի վերջին տարածքում՝ Լճաշենում, աղբահավաքման աշխատանքներով: Այն հիմնականում իրականացվել է տեղի և Երևանի դպրոցականների ու ուսանողների մասնակցությամբ: Երկու օրվա ընթացքում 130 կամավորի օժանդակությամբ հավաքվել է 9 մ3 աղբ, որը նախ տեսակավորվել է, ապա պահպանվել:

Նախագծի երկրորդ փուլը կմեկնարկվի սույն թվականի հուլիս 15-ին նոր կամավորների, նաև Երևանի դպրոցներից, Լճաշենի բնակիչների և աշակերտների հետ միասին: Սրան զուգահեռ, ֆրանս-հայկական ջրասույզների մի խումբ, որը գիտահետազոտական աշխատանք է կատարում Սևանա լճում, ցուցադրելու է իր աշխատանքը, թե ինչեր կարելի է գտնել ու հանել լճի հատակից:

Աղբահավաքման այս միջոցառումները հետապնդում են հասարակությանը ոգևորելու և որոշ տարածքներ մաքրելու նպատակ, բայց նաև դեն նետվող անպետք իրերին տալով «նոր կյանք»՝ ստանալ այլ իրեր՝ միաժամանակ զարգացնելով ստեղծագործական երևակայությունը:

Սա է մղում արվեստագետ Ալինա Մնացականյանին ստեղծելու «կիկլոպյան» արվեստի գործ: Բազմագույն պլաստիկե շշեր, մետաղի կտորներ և կենցաղային այլ թափոններ միացվելու են իրար և դառնալու են «քարեր», որոնք հետո վերածվելու են պատի։

Նախագծի ղեկավարները ցանկանում են արվեստի գործն ապագայում ցուցադրել Հայաստանի այլ քաղաքներում՝ ծրագրին առնչվող նյութերի վերաբերյալ նաև հանդիպումներ ու քննարկումներ կազմակերպելու առիթ ստեղծելով ՝ մշակութային արժեքների պահպանման, արժևորման, աղբի վերամշակման, բնապահպանական ուսուցման և այլ նպատակներով:

Նախագծի գործընկերներն են Երևանի քաղաքապետարանը, Շվեյցարական համագործակցության Հարավային Կովկասի գրասենյակը, Լճաշենի համայնքը, «Էկո Ինջինիրինգը», Արվեստի և մշակույթի հետազոտությունների լաբորատորիան (ACSL), Հետազոտության և ջրասույզների հայկական կենտրոնը: