Այս տարվա հուլիսի 10-ի դրությամբ Հայաստանից արտահանվել է 8430 տոննա ծիրան: Մինչդեռ ամբողջ 2011 թ. արտահանվել է 7031 տոննա:

Այսօր՝ ՀՀ գյուղատնտեսության նախարար Սերգո Կարապետյանի հրավիրած խորհրդակցության ժամանակ, նշվել է, որ ծիրանի արտահանումը շարունակվում է, և մինչև բերքաշրջանի ավարտ արտահանման ծավալները զգալիորեն կաճեն:

Խորհրդակցությանը մասնակցել են պտուղ և բանջարեղեն արտահանող խոշոր ընկերությունների ներկայացուցիչները: Սերգո Կարապետյանն արտահանողների ուշադրությունը հրավիրել է այն փաստի վրա, որ այս տարի առատ է նաև դեղձի բերքը: Նա նախօրեին եղել է Տավուշի մարզի Նոյեմբերյանի տարածաշրջանում, ուր առատ բերք է հասունանում:

Արտահանողները հավաստիացրել են, որ կարվի ամեն ինչ, ինչպես ծիրանի, այնպես էլ դեղձի արտահանման ենթակա ողջ ծավալը հանրապետությունից դուրս հանելու, դրսի սպառողին հասցնելու համար: