ԱՄՆ Ներկայացուցիչների պալատի հետախուզության հարցերով հանձնաժողովի նախագահ, հանրապետական Մայք Թըրները հայտարարություն է տարածել, որտեղ նախազգուշացրել է «ազգային անվտանգության լուրջ սպառնալիքի» մասին, և ԱՄՆ նախագահ Ջո Բայդենից պահանջել «գաղտնազերծել բոլոր տեղեկությունները», որոնք վերաբերում են այդ «սպառնալիքին»: Այդ մասին հայտնում է NBC News-ը։

Թըրների խոսքով՝ հանձնաժողովը Կոնգրեսի բոլոր անդամներին փոխանցել է տեղեկատվություն այն մասին, որը «վերաբերում է ազգային անվտանգության լուրջ սպառնալիքին»: Թե ինչ «սպառնալիքի» մասին է խոսքը, նա չի հստակեցրել։

Նա Բայդենին խնդրել է «գաղտնազերծել այս սպառնալիքին վերաբերող բոլոր տեղեկությունները, որպեսզի Կոնգրեսը, վարչակազմը և մեր դաշնակիցները կարողանան բաց քննարկել սպառնալիքին արձագանքելու համար անհրաժեշտ գործողությունները»:

Դեմոկրատական կուսակցությունից NBC News-ի աղբյուրը, որը «տեղյակ է սպառնալիքին», հայտնել է, որ «դա լուրջ խնդիր է, որը կարող է հանգեցնել իրավիճակի ապակայունացման ու ազգային անվտանգության սպառնալիքին»։ Նա դա նկարագրել է որպես «պոտենցիալ արտաքին սպառնալիք», բայց չի նշել, թե որտեղից է գալիս այն:

CNN-ը, հղում անելով իր աղբյուրներին, հայտնում է, որ սպառնալիքը կապված է Ռուսաստանի հետ։ Հեռուստաընկերության զրուցակիցները այն անվանել են որպես «շատ զգայուն»։ Աղբյուրներից մեկը, որը ծանոթ է հետախուզական տվյալներին, հայտարարել է, որ «իրականում դա բավականին մտահոգիչ և ապակայունացնող ռուսական ներուժ է, որի մասին մեզ վերջերս է հայտնի դարձել»:

Reuters-ը պնդում է, որ «սպառնալիքը» կապված է Ռուսաստանի և «տիեզերքում վերջինիս գործողությունների» հետ: Գործակալության զրուցակիցներն այլ մանրամասներ չեն հայտնել:

ԱՄՆ նախագահի ազգային անվտանգության հարցերով խորհրդական Ջեյք Սալիվանը հրաժարվել է նշել, թե ինչ սպառնալիքի մասին է խոսքը: Նա հայտարարել է, որ անձամբ է կապ հաստատել ազգային անվտանգության հարցերով հանձնաժողովների առաջատար օրենսդիրների հետ, նախքան Թըրները նախազգուշացրել է «լուրջ սպառնալիքի» մասին: Նրա խոսքով՝ Կոնգրեսի առաջնորդների հետ իր հանդիպումները, որոնք տեղեկություններ են ստանում հետախուզության տվյալների վերաբերյալ, նախատեսված են փետրվարի 15-ին: Սալիվանը հավելել է, որ զարմացած է Թըրների՝ հրապարակային հայտարարությամբ հանդես գալու որոշումից:

Spoke with 3 HPSCI members on the intel.

One said it’s “disturbing.”

Another said the issue is a longer-term concern, “not a today thing.”

And a 3rd confirmed “it’s a serious issue but not an immediate crisis.”

Still unclear what *it* is, though.

— Alex Ward (@alexbward) February 14, 2024

Politico-ի լրագրող Ալեքս Ուորդը, հղում անելով Ներկայացուցիչների պալատի հետախուզության հարցերով հանձնաժողովի երեք անդամներին, հայտնել է, որ «սպառնալիքի» մասին տեղեկատվությունը «լուրջ խնդիր է, բայց ոչ սուր ճգնաժամ»:

ABC News-ի երկու աղբյուրներ էլ, որոնք ծանոթ են Կոնգրեսում քննարկումներին, նշում են, որ հետախուզական տվյալները կապված են տիեզերքում միջուկային զենք տեղակայելու Ռուսաստանի մտադրության հետ: «Խոսքը ոչ թե Երկիր մոլորակի վրա այն նետելու, այլ արբանյակների դեմ հնարավոր օգտագործման մասին է»,- գրում է պարբերականը։

Լուսանկարը՝ civitatis.com-ից