Նյու Յորքի դատարանը ԱՄՆ նախագահի պաշտոնին հավակնող Դոնալդ Թրամփին մեղավոր է ճանաչել իր շինարարական բիզնեսի հետ կապված խարդախության մեջ և նրա նկատմամբ 354,9 միլիոն դոլարի տուգանք սահմանել:

Ինչպես հայտնում է Reuters գործակալությունը, դատարանի որոշմամբ Թրամփին նաև արգելվել է 3 տարի ղեկավար պաշտոններ զբաղեցնել Նյու Յորքում գործող ընկերություններում:

Այս գործով ամբաստանյալներ էին նաև Թրամփի երկու որդիները, որոնցից յուրաքանչյուրին դատարանը 4 միլիոն դոլար տուգանք է նշանակել:

Այս դատավարությունը տևեց շուրջ 3 ամիս։

Թրամփի պաշտպանական թիմը հայտարարել է, որ բողոքարկելու է դատավճիռը: Թրամփն, իր հերթին, սոցցանցերում հայտարարել է «ընտրություններին միջամտության» և «վհուկների որսի» մասին՝ դատավորին և Նյու Յորքի գլխավոր դատախազին մեղադրելով կոռուպցիայի և «անազնիվ խաղի» մեջ:

Լուսանկարը՝ Andrew Kelly/Reuters