«Հայկական ժամանակի» տեղեկություններով` վերջին երկու ամսում խիստ լարվել են դատական համակարգի ղեկավարության և ՀՀ գլխավոր դատախազ Աղվան Հովսեփյանի հարաբերությունները: Դատավորները փորձում են հասնել Հովսեփյանի պաշտոնանկությանը:

Միայն ընթացիկ շաբաթում, որպես Հովսեփյանի դեմ բողոքի «ակցիա», դատավորները երկու մեղադրական եզրակացություն են մերժել: Մի դեպքում Շենգավիթ վարչական շրջանի ընդհանուր իրավասության դատարանն է արդարացման դատավճիռ կայացրել, իսկ վերաքննիչ դատարանն էլ մեկ այլ գործով մեղադրական դատավճիռը բեկանել և ուղարկել է նոր քննության:

«Հայկական ժամանակի» տեղեկություններով` Հովսեփյանի դեմ դատավորների սկսած արշավի թիկունքում կանգնած է գլխավոր դատախազի տեղակալ Գևորգ Կոստանյանը, որը, սակայն, աշխատում է մնալ աննկատ` ձևացնելով, թե ինքը ոչ մի առնչություն չունի այդ ամենի հետ, պարզապես Հովսեփյանն այլևս ի վիճակի չէ վերահսկել դատավորներին: