![](/static/articles/16/46/35/l-ZoWU0a2zRy.jpg)
Համդի Ուլուկայան միանում է «Ավրորա» մրցանակի Ընտրող հանձնաժողովին
«Ավրորա» մարդասիրական նախաձեռնության «Ավրորա» համաշխարհային մարդասիրական մրցանակի Ընտրող հանձնաժողովին է միացել «Չոբանի» ընկերության հիմնադիր եւ գլխավոր տնօրեն, Tent Partnership for Refugees հիմնադրամի հիմնադիր Համդի Ուլուկայան: Այս մասին հայտնում են «Ավրորա» մարդասիրական նախաձեռնությունից։
ԱՄՆ-ում բնակվող ձեռներեցն աշխարհին հայտնի է դարձել ինչպես իր հաջող բիզնես նախաձեռնություններով, այնպես էլ ոգեշնչող բարեգործական աշխատանքով: Այժմ միանալով «Ավրորա» մրցանակի Ընտրող հանձնաժողովի մյուս հեղինակավոր անդամներին՝ Ուլուկայան կմասնակցի «Ավրորայի» հերոսների եւ մրցանակի դափնեկրի ընտրությանը:
«Համդին մարմնավորում է «Ավրորայի» «Երախտագիտությունն՝ ի գործ» առանցքային գաղափարը: Նա զգալի ներդրում ունի ողջ աշխարհում իր կատարած աշխատանքով, գաղափարներով եւ բարեգործությամբ», - ասաց «Ավրորա» մարդասիրական նախաձեռնության համահիմնադիր Նուբար Աֆեյանը: «Մենք երախտապարտ ենք Համդիին իր գործադրած մեծագույն ջանքերի համար եւ սպասում ենք նրա ակտիվ մասնակցությանը «Ավրորա» մրցանակի Ընտրող հանձնաժողովի աշխատանքներում»:
2007 թ. Համդի Ուլուկայան Միացյալ Նահանգներում հիմնեց «Չոբանի» ապրանքանիշը: Առաջին յոգուրտը վաճառելուց հինգ տարի անց «Չոբանին» արդեն միլիարդ դոլար արժողությամբ ապրանքանիշ էր, եւ այսօր այն ԱՄՆ-ում յոգուրտի վաճառքի ցուցանիշով առաջին տեղում է: Որպես սննդի արտադրության ոլորտի առաջատար՝ իր բիզնեսը զարգացնելիս Ուլուկայան որդեգրեց բարեգործական մոտեցում: Միայն 2020-2021 թթ. ընկերությունը նվիրաբերել է 10.5 միլիոն ապրանք՝ հանուն Ամերիկայում պարենային անվտանգության: Այն նաեւ սատարում է 17 միլիոն ամերիկացի երեխաների շրջանում սովի վերացմանն ուղղված ռազմավարությանը:
«Համդի Ուլուկայան ոչ միայն կայացած ձեռներեց է եւ գործարար առաջնորդ, այլեւ փախստականների եւ տեղահանվածների շահերի մեծ ջատագով, որը հսկայական ազդեցություն է թողել ուրիշների կյանքի վրա: Մենք ուրախ ենք ողջունել նրան Ընտրող հանձնաժողովի կազմում», - ասաց «Ավրորա» մրցանակի Ընտրող հանձնաժողովի նախագահ, Լոնդոնի կայսերական քոլեջի Գլոբալ առողջապահական նորարարությունների ինստիտուտի համաղեկավար Լորդ Արա Դարզին: «Համդին իր փորձառությամբ եւ գաղափարներով մեծ նպաստ կբերի «Ավրորա» մրցանակին՝ խթանելով վերջինիս կարողությունները՝ ընդլայնելու իր ազդեցությունը եւ օգնության ձեռք մեկնելու առավել կարիքի մեջ գտնվողներին»:
Ուլուկայան հայտնի է իր աշխատակիցների հանդեպ հոգատար քաղաքականությամբ, այդ թվում՝ իր աշխատակիցների համար շահույթի բաշխման եւ վճարովի ծնողական արձակուրդի նորարարական ծրագրերի ներդրմամբ, ինչպես նաեւ ժամավճարի մրցակցային բարձրացմամբ, որը գերազանցում է դաշնային մակարդակը: Դառնալով փախստականներին աշխատանքի ընդունել քարոզող շարժման առաջատարը՝ 2016 թ. նա ստեղծեց Tent Partnership for Refugees հիմնադրամը: Այն մոբիլիզացնում է գործարար համայնքը՝ կապ ստեղծելու փախստականների հետ աշխատանքի համար:
«Ինձ համար պատիվ է միանալ «Ավրորա» մրցանակի Ընտրող հանձնաժողովին եւ օգնել մերօրյա հերոսներին ընդլայնելու իրենց գործունեությունն ամբողջ աշխարհում. նրանց, ովքեր վտանգում են սեփական անձը՝ դիմակայելու աշխարհի ամենահրատապ մարդասիրական մարտահրավերներին», - նշեց «Չոբանի» ընկերության հիմնադիր եւ գլխավոր տնօրեն, Tent Partnership for Refugees հիմնադրամի հիմնադիր Համդի Ուլուկայան: ««Ավրորան» ճանաչում է մեկ անհատի ուժն ու ազդեցությունն աշխարհի վրա, եւ ես անհամբեր եմ՝ միանալու այս հեղինակավոր խմբին՝ միասին բացահայտելու եւ աշխարհին ցույց տալու անհայտ հերոսների մարդասիրական խիզախ աշխատանքը»:
«Ավրորա» համաշխարհային մարդասիրական մրցանակը 1 միլիոն ԱՄՆ դոլար պարգեւ է, որը շնորհվում է նրանց, ովքեր վտանգում են սեփական կյանքը, առողջությունը կամ ազատությունը՝ փրկելու այլոց կյանքը, առողջությունը կամ ազատությունը: Իր ստեղծումից ի վեր (2015 թ.) այն լույս է սփռում աշխարհի մի շարք ամենահրատապ եւ անտեսված ճգնաժամերի վրա: 2024 թ. «Ավրորա» համաշխարհային մարդասիրական մրցանակի հավակնորդների անունները հայտարարվեցին 2023 թ. սեպտեմբերի 18-ին Նյու Յորքում՝ «Քլինթոն» համաշխարհային նախաձեռնության (CGI) ամենամյա միջոցառման ընթացքում:
«Ավրորա» մարդասիրական նախաձեռնությունը հատուկ միջոցառումների շարք կանցկացնի 2024 թ. մայիսի 8-10-ը Լոս Անջելեսում: Դրանք տեղի կունենան Կալիֆորնիայի համալսարանի «Խոստում» մարդու իրավունքների ինստիտուտի հետ համագործակցությամբ: Մարդասիրության ոլորտի առաջատարները կհավաքվեն՝ քննարկելու աշխարհի ամենահրատապ մարդասիրական խնդիրները: Կհայտարարվի նաեւ 2024 թ. «Ավրորա» մրցանակի դափնեկրի անունը:
* * *
«Ավրորա» համաշխարհային մարդասիրական մրցանակի մասին
«Ավրորա» համաշխարհային մարդասիրական մրցանակը 1 միլիոն ԱՄՆ դոլար պարգեւ է, որը շնորհվում է նրանց, ովքեր վտանգում են սեփական կյանքը, առողջությունը կամ ազատությունը՝ փրկելու այլոց կյանքը, առողջությունը կամ ազատությունը: Իր ստեղծումից ի վեր (2015 թ.) այն լույս է սփռում աշխարհի մի շարք ամենահրատապ եւ անտեսված ճգնաժամերի վրա: 2024 թ. «Ավրորա» համաշխարհային մարդասիրական մրցանակի հավակնորդ 2024 թ. «Ավրորայի» հերոսների անունները հայտարարվեցին 2023 թ. սեպտեմբերի 18-ին «Քլինթոն» համաշխարհային նախաձեռնության (CGI) ամենամյա միջոցառման ընթացքում Նյու Յորքում.
- Աբդուլհադի ալ-Խավաջա (Բահրեյն/Դանիա)՝ մարդու իրավունքների պաշտպան, որը խիզախորեն պաշտպանել է Բահրեյնի ամենախոցելի համայնքների իրավունքները:
- Դենիս Մուկվեգե (Կոնգոյի Դեմոկրատական Հանրապետություն)՝ գինեկոլոգ եւ մարդու իրավունքների պաշտպան, որը բժշկական, իրավաբանական եւ սոցիալ-հոգեբանական աջակցություն է տրամադրում պատերազմի ժամանակ սեռական եւ գենդերային բռնության ենթարկված կանանց:
- Նասրին Սոթուդե (Իրան)՝ մարդու իրավունքների պաշտպան, որը 2003 թվականից հանդես է գալիս որպես փաստաբան՝ ներկայացնելով իրանցի ընդդիմադիր գործիչների, երիտասարդ բանտարկյալների եւ կանանց իրավունքների պաշտպանների շահերը:
2024 թ. «Ավրորա» մրցանակի դափնեկրի անունը կհայտարարվի մրցանակի շնորհման արարողության ժամանակ, որը տեղի կունենա Լոս Անջելեսում 2024 թ. մայիսին
«Ավրորա» մարդասիրական նախաձեռնության մասին
«Ավրորա» մարդասիրական նախաձեռնությունը ձգտում է լուծել մարդասիրական խնդիրներն աշխարհի տարբեր անկյուններում՝ տեղում օգնելով ամենակարիքավորներին: «Ավրորան» բարեփոխել է խիստ կարիքի մեջ գտնվող մարդկանց կյանքը՝ բացահայտելով եւ աջակցելով մարդասեր հերոսներին ու նրանց խիզախ գործունեությունը:
Մեկնաբանել