Գլխավոր դատախազության ապօրինի ծագում ունեցող գույքի բռնագանձման գործերով վարչությունում ուսումնասիրություն է իրականացվել Գյուղատնտեսության, Բնապահպանության նախկին նախարար, Արարատի նախկին մարզպետ Արամայիս Գրիգորյանին ու ընտանիքի անդամներին պատկանող գույքի առնչությամբ: Կազմվել է ամփոփագիր և նախկին նախարարին, կնոջը, դստերն ու որդուն հրավիրել են դատախազություն, որպեսզի ծանոթանան գործի նյութերին:

2024թ. փետրվարի վերջից արգելանք է դրվել նաև «ԹԵԳԱԱՐ» ՍՊԸ-ում Արամայիս Գրիգորյանի ունեցած 50% սեփականության վրա, ինչպես նաև «Գրիգորյան Գրուպ» գինու գործարանի ամբողջ գույքի վրա, քանի որ Արամայիս Գրիգորյանը միակ սեփականատերն է: Մարտի 1-ին էլ արգելանք է դրվել «Կովկաս» առևտրի տուն ՍՊԸ-ում նախկին նախարարին պատկանող 33% սեփականության վրա՝ արգելելով Արամայիս Գրիգորյանին «ընկերության 33% բաժնեմասի տնօրինման հետ կապված որևէ գործողություն կատարել»։

Ուշագրավն այն է, որ արգելանք է դրվել նաև «Մխչյանի» գինու, կոնյակի գործարան ՍՊԸ-ի վրա, որի միակ սեփականատերը եղել է Ա. Գրիգորյանը: Մինչդեռ այս ՍՊԸ-ն դեռևս 2017թ․-ի դեկտեմբերի 30-ին լուծարվել է:

Քանի որ ենթադրյալ ապօրինի գույքի գործով անցնում է նաև Արամայիս Գրիգորյանի որդին՝ Թեմուր Գրիգորյանը, և կինը՝ Ալիսա Գրիգորյանը, արգելանք է դրվել նաև նրանց պատկանող «Արարատյան ավտոկայարան» և «Ալինե» ՍՊԸ-ների վրա՝ յուրաքանչյուրը 50%-ի չափով:

Իրավաբանական անձանց պետական ռեսգիստրում Արամայիս Գրիգորյանի դստեր անունով ընկերություն գրանցված չէ:

Նշենք, որ երկու գերատեսչության նախարար, մարզպետ նշանակվելուց բացի Արամայիս Գրիգորյանը եղել է նաև Ազգային ժողովի պատգամավոր: Իսկ մինչ պետական պաշտոն զբաղեցնելը եղել է Ավշարի գինու գործարանի տնօրենը:

Լուսանկարը՝ 168.am-ի