Մեկնարկեց Ազգային գրադարանային շաբաթը

Այսօր մեկնարկեց Հայկական գրադարանային ասոցիացիայի հայտարարած Ազգային գրադարանայի շաբաթը: Տարին հոբելյանական է ասոցիացիայի համար, քանի որ լայնածավալ այս միջոցառումն անց է կացվում արդեն 10-րդ անգամ: Հայկական գրադարանային ասոցիացիային անդամագրվել են նաև ԼՂՀ գրադարաններ և Ազգային գրադարանային շաբաթն այս տարի կնշվի նաև Արցախում:

Նախորդ տարիներին Շաբաթն ունեցել է տարբեր կարգախոսներ` «Մեր ապագան կարդացող երեխան  է», «Գրադարան` քաղաքակրթությունների խաչմերուկ», «Գրադարան` գիտելիքի տուն», «Գրադարան` իմացության բանալի», «Հայացք գյուղի գրադարանին», «Խոնարհվիր գրքին, որ բարձրանաս նրանով» և այլն: Այս անգամ այն նվիրված է հայկական գրատպության 500-ամյակին և կրում է «Գրատպություն` գիտելիքի հավերժական ներկայություն» կարգախոսը: Շաբաթվա յուրաքանչյուր օրն ունի իր խորագիրը: Հանդիսավոր բացմանը բազմաբնույթ միջոցառումներով անդրադարձել է Ազգային գրադարանը:

Ազգային գրադարանային շաբաթը Ազգային գրադարանում մեկնարկեց գրադարանի օրհներգի հնչյունների ներքո /խոսք` Արմեն Բաղդասարյանի, երաժշտությունը` Աշոտ Աշիկյանի, կատարումը` ԵՊԿ երգչախմբի/: Շաբաթի հանդիսավոր բացման ժամանակ ՀԱԳ տնօրեն Դավիթ Սարգսյանը խոսեց գրադարանների դերի, կարևորության մասին, հատկապես գյուղական վայրերում, որտեղ արդեն առկա է ոգու սովը, քանզի շատ համայնքապետեր փակում են գրադարանները` բնակչությանը զրկելով հոգեկան պահանջները բավարարելու իրավունքից, ի դեպ, նաև խախտելով ՏԻՄ մասին օրենքը, որտեղ հստակ նշված է. «Պահպանել և զարգացնել գրադարանները»:

Խոսելով շաբաթի կարգախոսի մասին` նա նշեց, որ պատահական չէ ընտրված այն, քանզի պատմական, հասարակական կյանքի թելադրանքով հայ գիրքը իր ճանապարհն սկսել է Հայաստանից դուրս. «Առաջին հայերեն գիրքը տպագրվել է Իտալիայում` Վենետիկում, առաջին պարբերականը` Հնդկաստանում` Մադրասում, առաջին քարտեզը` Համատարած աշխարհացույցը Ամստերդամում, և պահպանելով այս աշխարհագրությունը, մենք պետք է կարողանանք ներկայացնել այս երկրների հայկական տպագրության պատմությունը»:

«Ազգային գրադարանային շաբաթի նպատակն է` գրադարանների վրա հրավիրել հասարակության բոլոր շերտերի ուշադրությունը, որի դերը մեծ է քաղաքակիրթ քաղաքացի կրթելու գործում, գրադարանն է ձևավորում գրագետ, համաշխարհային քաղաքացու կարգավիճակ ունեցող ժողովուրդ, և շաբաթի նպատակն է` նրանց մեջ դաստիարակել գեղագիտությունը, հայրենասիրություն, մարդասիրությունը, բարոյական այն արժեքներըները, որոնք երբեմն, ցավոք, մնում են միայն որպես գաղափար: Մի գրչի հարվածով այսօր փակվում են շատ գրադարաններ: Շատերը գտնվում են շենքերի առաջին հարկերում և չեն հրապուրում ընթերցողներին: Մինչդեռ այն պետք է ունենա առանձին շենք, լռության գոտի լինի շուրջբոլորը, որտեղ մարդիկ պետք է պարապեն, ստեղծագործեն, գիտություն, տնտեսություն, մշակույթ ստեղծեն»,-նշեց Դ.Սարգսյանը:

Նա կոչ արեց գրադարաններին` Շաբաթը չդարձնել ինքնանպատակ, այլ այն ծառայեցնել գրադարանների խնդիրների լուծմանը. խնդիրներ դնել համապատասխան մարմինների առաջ, հակառակ դեպքում կկանգնենք արժեզրկման փաստի առաջ: Եզրափակելով իր խոսքը` Դ.Սարգսյանը նշեց, որ գրադարանային ոլորտը մշակութային «ցնցումների» կարիք ունի, որի համար անհրաժեշտ է ոչ միայն համայնքապետերի ուշադրությունը և հոգատարությունը, այլ նաև գրադարանավարների, գրադարանների պատասխանատուների ակտիվությունը:

ՀԱԳ փոխտնօրեն Ռաֆիկ Ղազարյանը փաստեց, որ այսօր ՀՀ-ում փակվում են գրադարաններ և Հայկական գրադարանային ասոցիացիայի կարևոր խնդիրներից է` պահպանել գրադարանները: Նա փաստեց, որ Հայկական գրադարանային ասոցիացիան կարողացել է կանխել գրադարան փակելու մի քանի դեպք, երբ այդ մասին ահազանգել են, սակայն շատ դեպքերում այդ մասին գրադարանների պատասխանատուները տեղեկացնում են միայն փակելուց հետո:

Նա խոսեց նաև այն ցավոտ հարցի մասին, ըստ որի գյուղական գրադարանները շատ դեպքերում միացվում են դպրոցական գրադարաններին. «մինչդեռ դրանք տարբեր գործառույթներ ունեն»: Ռ.Ղազարյանը կոչ արեց գրադարանավարներին` լինել միասնական, միահամուռ ուժերով բարելավել գրադարանային ոլորտը:

ԱԳՇ բացման ժամանակ ներկաներին ողջունեց և շնորհավորեց Հայաստանի գրողների միության նախագահ Լևոն Անանյանը: Գրքի և ընթերցանության գործում ունեցած ավանդի համար նա ՀԳՄ պատվոգիր հանձնեց Ազգային գրադարանի տնօրեն Դավիթ Սարգսյանին և մի քանի գրադարանավարների: ՀԱԳ փոխտնօրեն Ռաֆիկ Ղազարյանն արժանացավ «Սիլվա Կապուտիկյան» հիմնադրամի պատվոգրին:

Ազգային գրադարանային շաբաթի բացումը ողջունեց ՄԱԿ-ի հանրային տեղեկատվության վարչության ներկայացուցիչ Մարիա Դոցենկոն: Նա կարևորեց ՄԱԿ-ի հանրային տեղեկատվության և Հայաստանի Ազգային գրադարանի միջև համագործակցությունը, որի արդյունքում նոր գրականությամբ են համալրվում մարզային, գյուղական գրադարանները:

Ներկաներին շնորհավորեց Գյումրիի Հովհ.Շիրազի տուն-թանգարանի տնօրեն Արա Պապանյանը, Աջափնյակի գրադարանի տնօրեն Գոհար Հակոբյանը:

Ելույթներին հաջորդեցին երաժշտական կատարումներ: Նույն օրը հանրությանը ներկայացվեց Հայաստանի Ազգային գրադարանի կայք-էջը` ավելի թարմացված, նորացված տեսքով: Կայքում արտացոլված են Ազգային գրադարանը` բաժիններն, իրենց գործառույթներով, գրադարանում տեղի ունեցող միջոցառումները, գրադարանային նորությունները, Հայ գրքի մատենագիտությունը, առանձին բաժնով ներկայացված է Շրջիկ գրադարանը` իր պատմությամբ, գործառույթներով: Ազգային գրադարանի մասին ամեն տեսակի ինֆորմացիա կարելի է ստանալ` այցելելով www.nla.am կայք-էջ:

Ազգային գրադարանային շաբաթի շրջանակներում գրադարանում բացվեց «Գրիգոր Խանջյանի արվեստը» խորագրով ցուցահանդես, որտեղ ներկայացված են ավելի քան 20 միավոր գրքեր, հանդեսներ, ալբոմներ, վերատպություններ:

Նշենք, որ Ազգային գրադարանային շաբաթի շրջանակներում վաղը Հայաստանի Ազգային գրադարանում կբացվի հայկական գրատպության 500-ամյակին նվիրված ցուցահանդես, տեղի կունենա Ասլան Ասլանյանի «Սայիադ – Նովա» գրքի շնորհանդեսը:

Ապրիլի 13-ին կբացվի նկարիչ Ռոբերտ Էլիբեկյանի 70-ամյակին նվիրված ցուցահանդես, կլինեն երաժշտական լսումներ` նվիրված Առնո Բաբաջանյանի 90-ամյակին: Ապրիլի 14-ին կբացվեն Գրիգոր Զոհրապի 150, Գարեգին Նժդեհի 125-ամյակներին նվիրված գրականության ցուցահանդեսները, տեղի կունենա Վահան Տերյանին նվիրված ցերեկույթ:

Ապրիլի 15-ին տեղի կունենա 1980-1995 թվերին Լոնդոնում Թեքեյան խնամակալ մարմնի հովանավորությամբ և դոկտ. Անդրեաս Ծուլիկյանի խմբագրությամբ հրատարակված «Էրեբունի» ազգային, մշակութային և հասարակական երկշաբաթաթերթի ամբողջական և հազվագյուտ համարներից բաղկացած հավաքածուի 5 հատորները անձնական նախաձեռնությամբ գրադարանին հանձնելու արարողությունը:

Ցերեկույթի ընթացքում անդրադարձ կլինի պարբերականի ծագմանն ու բովանդակությանը, ինչպես նաև 12 տարի անընդմեջ /1980-1992 թթ./ թերթի խմբագրական աշխատանքները սիրահոժար վարած դոկտ. Անդրեաս Ծուլիկյանի ազգային-հասարակական գործունեությանը: Նույն օրը Շրջիկ գրադարանով այցելություն կլինի Կոտայքի մարզի Չարենցավանի մարզային, Հրազդանի համայնքային գրադարաններ, Ազգային գրադարանը և Հայկական գրադարանային ասոցիացիան գրականություն կնվիրի գրադարաններին:

Ապրիլի 16-ին Ազգային գրադարանը կներկայացնի Հնդկաստանում տպագրված հայկական գրքեր և ամսագրեր, իսկ ապրիլի 18-ին Ազգային գրադարանում տեղի կունենա Ազգային գրադարանային շաբաթի փակումը: Այս մասին տեղեկացնում է Ազգային գրադարանի հանրության հետ կապերի և միջոցառումների կազմակերպման բաժինը: