Հայաստանի մարզիկները Թաիլանդում կայացած աշխարհի մուայ թայի  առաջնությունից վերադառնում են ոսկե, արծաթե և բրոնզե մեդալներով։ Այս մասին հայտնում է, Հայաստանի պրոֆեսիոնալ մուայ թայ ֆեդերացիան։

Հայաստանի պրոֆեսիոնալ մուայ թայ  ֆեդերացիայի հավաքականը Բանգկոկում այս տարվա մարտի 12-20-ը մասնակցել է  World Muaythai Federation-ի կազմակերպած World Muaythai Championship 2024-ին։

Թաիլանդական մարտարվեստում Հայաստանի պրոֆեսիոնալ մուայ թայ  ֆեդերացիայի հավաքականի ամենակրտսեր մարզիկը՝ Ռաֆայել Եզդօղլյանը (8 տարեկան), 30 կգ քաշային կարգում արժանացել է բրոնզե մեդալի։ 

Մինչ այս, Ռաֆայելը մենամարտեր է անցկացրել նաև Հայաստանում և Վրաստանում՝ գրանցելով բարձր արդյունքներ։

Ավագ մարզիկներից բրոնզե մեդալի են արժանացել Դավիթ Մեսրոպյանը՝ մինչև 57 կգ  քաշային կարգում և Հովիկ Քալաշյանը՝ մինչև 63.5 կգ քաշային կարգում։ 

Ռոման Քալաշյանն արժանացել է արծաթե մեդալի։ Քալաշյանը եզրափակիչ մենամարտում մինչև 71 կգ քաշային կարգում մենամարտել է Ավստրալիայի մարզիկի դեմ։  Ռոման Քալաշյանը նաև  բազմակի միջազգային և պրոֆեսիոնալ մրցաշարերի հաղթող է։ 

Երեք հայ մարզիկները՝ աշխարհի չեմպիոն

Պրոֆեսիոնալ Մուայ թայ  ֆեդերացիայի հավաքականի երեք մարզիկներ դարձել են աշխարհի չեմպիոն։ 

Ալեքսանդր Աբրամյանը 14-15 տարեկանների մինչև 67 կգ քաշային կարգում World Muaythai Championship 2024-ին արժանացել է ոսկե մեդալի։ Ալեքսանդրը եզրափակիչ մենամարտում հաղթել է Մեքսիկայի հավաքականի մարզիկին։ 

Սոֆիա Պոլովկովան  մենամարտել է մինչև 60 կգ  քաշային կարգում և եզրափակիչ մենամարտում հաղթել է Լիբանանի մարզուհուն՝ դառնալով աշխարհի չեմպիոն։ 

Հայկ Վարդանյանը ևս  World Muaythai Championship 2024-ին արժանացել է մեծահասակների ոսկե մեդալի՝ մենամարտելով մինչև 54 կգ քաշային կարգում։ 

Թաիլանդում աշխարհի մուայ թայի  առաջնությանը հանդես եկած հայ մարզիկները միջազգային մրցաշարերի մասնակիցներ են, երևանյան և մարզային սպորտային ակումբների և մարզադպրոցների մարզիչներ են։ 

Պրոֆեսիոնալ մուայ թայ ֆեդերացիայի նախագահ Արամ Աբրամյանը նկատում է, որ տարեցտարի մուայ թայ մարզաձևը ավելի պահանջված է դառնում Հայաստանում։ Թաիլանդական այս մարտարվեստով հետաքրքրված են ինչպես կրտսեր, այնպես էլ՝ արդեն պրոֆեսիոնալ մարզիկները։ 

«Մենք կատարել ենք շատ ծանր աշխատանք և հասել ենք հաջողության։ Մեր մարզիկները փայլուն մենամարտեր անցկացրին։ Ունեցել ենք ծանր մենամարտեր և գոհացնող արդյունքներ»,- նշում է Արամ Աբրամյանը։

Պրոֆեսիոնալ մուայթայ ֆեդերացիան («Մուայ թայ պրոֆեսիոնալ հայկական ֆեդերացիա» ՀԿ) հիմնադրվել է 2011 թվականին։  2015 թվականին ֆեդերացիայի հավաքականն առաջին անգամ մասնակցել է World Muaythai Championship-ին։ Հաջորդ մասնակցությունը գրանցել է 2016 թվականին, որտեղ մարզիկ Էդգար Մելքոնյանը դարձել է աշխարհի չեմպիոն մինչև 60 կգ քաշային կարգում։ 

Լուսանկարը՝ Մուայթայ ֆեդերացիայի