Ռուսաստանը Ադրբեջանին և Հայաստանին կոչ է անում առավելագույն զսպվածություն ցուցաբերել և խուսափել ագրեսիվ հռետորաբանությունից, իսկ տարածքային բոլոր վեճերն ու փոխադարձ հավակնությունները լուծել բացառապես քաղաքական-դիվանագիտական ճանապարհով։ Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Նման հարցերը, այդ թվում՝ անկլավների վերադարձի և փոխանակման հարցերը, պետք է լուծել հայ-ադրբեջանական սահմանի սահմանազատման երկկողմ հանձնաժողովի շրջանակներում։ Մենք, մեր կողմից, պատրաստ ենք առավելագույն աջակցություն ցուցաբերել այդ աշխատանքին՝ հաշվի առնելով Ռուսաստանի մոտ առկա եզակի քարտեզագրական նյութերն ու փորձագիտական կազմի առկայությունը»,- նշել է Զախարովան։

Նրա խոսքով՝ նմանատիպ սկզբունքները կիրառելի են նաև Հայաստանի և Ադրբեջանի միջև տրանսպորտային հաղորդակցությունների ապաշրջափակման հարցում:

Զախարովան նշել է, որ կա փոխզիջումների մշակման կայացած մեխանիզմ։ Դա, ըստ նրա, Ռուսաստանի, Ադրբեջանի և Հայաստանի փոխվարչապետների եռակողմ աշխատանքային խումբն է:

ՌԴ ԱԳՆ ներկայացուցիչը հիշեցրել է, որ 2023 թվականի վերջին նիստում կողմերը մոտ էին տարածաշրջանում տրանսպորտային-տնտեսական երթուղիների ապաշրջափակման համալիր փոխշահավետ որոշման ընդունմանը։

Վերջում Զախարովան կողմերին կոչ է արել քաղաքական կամք դրսևորել և վերսկսել փոխգործակցությունը «հաստատված եռակողմ ձևաչափերով, ներառյալ եռակողմ աշխատանքային խումբը»:

Լուսանկարը՝ Sputnik / Евгений Одиноков