Ռուսաստանը Հայաստանին և Ադրբեջանին կոչ է անում վերականգնել եռակողմ երկխոսության մեխանիզմների աշխատանքը: Այդ մասին կայացած ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Կարծում ենք, որ վաղուց ժամանակն է վերականգնել Ռուսաստան-Ադրբեջան-Հայաստան եռակողմ մեխանիզմների ռիթմիկ աշխատանքը: Կոչ ենք անում գործընկերներին դրսևորել քաղաքական կամք, վերսկսել շփումները, որոնք ապացուցել են իրենց արդյունավետությունն այն ձևաչափերում, որոնց շրջանակներում Ռուսաստանի աջակցությամբ սկսվել են ամենաբարդ հարցերի արդյունավետ լուծումների որոնումը, ներառյալ՝ սահմանի սահմանազատումը, տարածաշրջանում տրանսպորտային և տրանսպորտային երթուղիների ապաշրջափակումը, խաղաղության պայմանագրի մշակումը»,- հայտարարել է Զախարովան։

Նրա խոսքով՝ Բաքվի և Երևանի միջև տարածքային բոլոր վեճերն ու հավակնությունները պետք է կարգավորվեն բացառապես քաղաքական-դիվանագիտական մեթոդներով՝ հայ-ադրբեջանական սահմանի սահմանազատման երկկողմ հանձնաժողովի շրջանակներում: «Մենք պատրաստ ենք մեր կողմից ամեն կերպ աջակցել դրան»,- հավելել է նա:

Իր հայտարարության մեջ Զախարովան չի մոռացել անդրադառնալ նաև ԱՄՆ-ի ու Եվրամիության «ապակառուցողական դերին»։ «Ի տարբերություն Եվրամիության և ԱՄՆ-ի, որոնք զբաղվում են մի կողմից զիջումների կորզմամբ և մյուսի հասցեին սպառնալիքների առաջադրմամբ, մենք միշտ հանդես ենք եկել առկա տարաձայնությունների համապարփակ, փոխզիջումային կարգավորման օգտին՝ ի շահ ներկայիս Կովկասում կայուն խաղաղության և բարգավաճման հաստատման: Մեր առաջարկը մնում է բանակցությունների սեղանին»,- եզրափակել է Զախարովան։

Վերջին օրերին Երևանն ու Բաքուն միմյանց մեղադրում են սահմանին լարվածության սրման շուրջ։ Երևանի պնդմամբ՝ Բաքուն տեղեկատվական հող է նախապատրաստում հայ-ադրբեջանական շփման գծին սադրանքներ իրականացնելու մեջ։ Բաքուն էլ իր հերթին պնդում է, թե իբր Երևանը զորքեր է տեղակայում սահմանին։ Երևանում հերքում են այդ լուրերը։

Լուսանկարը՝ Sputnik / Евгений Одиноков