ԱՄՆ պետքարտուղար Էնթոնի Բլինքենը Ադրբեջանի նախագահ Իլհամ Ալիևի հետ հեռախոսազրույցում հայտարարել է, որ ապրիլի 5-ին նախատեսված ԱՄՆ-Եվրամիություն-Հայաստան եռակողմ հանդիպումը հիմնականում նվիրված է տնտեսական հարցերին և ուղղված չէ Բաքվի դեմ: Այդ մասին նշվում է Ադրբեջանի նախագահի մամուլի ծառայության տարածած հաղորդագրության մեջ։ Ադրբեջանական կողմի փոխանցմամբ՝ հեռախոսազրույցը կայացել է ամերիկյան կողմի նախաձեռնությամբ։

«Էնթոնի Բլինքենն ասել է, որ տվյալներ է ստանում ապրիլի 5-ին ԱՄՆ-ի, Եվրամիության և Հայաստանի միջև տեղի ունենալիք հանդիպումից ադրբեջանական կողմի մտահոգությունների մասին և կարևոր է համարում նախագահ Իլհամ Ալիևի հետ զրույցում այդ հարցի շուրջ հստակություն մտցնելը: Պետքարտուղարն ընդգծել է, որ նշված հանդիպման հիմնական բովանդակությունը կազմելու են Հայաստանի տնտեսական զարգացման հարցերը»,- ասված է հաղորդագրության մեջ։

Ինչպես նշվում է Ադրբեջանի նախագահի մամուլի ծառայության տարածած հաղորդագրության մեջ, Բլինքենը նաև հայտարարել է, որ ապրիլի 5-ի հանդիպումն ուղղված չէ Ադրբեջանի դեմ:

Ըստ այդ հաղորդագրության՝ Ալիևը հերքել է Արևմուտքում հնչող այն մեղադրանքները, թե Ադրբեջանը մտադիր է հարձակվել Հայաստանի վրա՝ «դրանք անվանելով բացարձակապես անհիմն»։

«Զրույցի ընթացքում քննարկվել են Հայաստանի և Ադրբեջանի միջև խաղաղ բանակցություններին վերաբերող հարցեր: Նախագահ Իլհամ Ալիևը նշել է, որ խաղաղության պայմանագրի տեքստի շուրջ Բեռլինում Ադրբեջանի և Հայաստանի արտգործնախարարների անցկացրած բանակցություններն օգտակար են եղել բանակցային գործընթացի առաջմղման տեսանկյունից, և դրա արագացման անհրաժեշտություն կա: Նա նաև ընդգծել է, որ Արևմուտքում հնչող մեղադրանքները, թե Ադրբեջանը մտադիր է հարձակվել Հայաստանի վրա, բացարձակապես անհիմն են»,- ասված է հաղորդագրության մեջ։

Լուսանկարը՝ Ադրբեջանի նախագահի մամուլի ծառայության