Երևան քաղաքի ընդհանուր իրավասության քրեական դատարանը, դատավոր Ժորա Չիչոյանի նախագահությամբ, քիչ առաջ որոշեց  «Քաղաքացիական պայմանագիր» խմբակցության պատգամավոր Հակոբ Ասլանյանի հետ վիճաբանած Սամվել Վարդանյանի նկատմամբ կալանք չկիրառել, այլ տնային կալանք և 7 մլն դրամ գրավ սահմանել:

Հիշեցնենք, որ ապրիլի 15-ին Ազգային ժողովի «Քաղաքացիական պայմանագիր» խմբակցության պատգամավոր Հակոբ Ասլանյանի հետ երթուղային ավտոմեքենայում վիճաբանության էր եղել: Միջադեպի մասնակիցներից Սամվել Վարդանյանին նույն օրը ձերբակալել էին և կեսգիշերին քննչական վարչությունից տեղափոխել ձերբակալվածների պահման վայր: Վարչության շենքից 1-2 րոպե հեռանալուց հետո ուղեկցող երկու ոստիկանի մոտ միաժամանակ «բնական կարիքները» հոգալու անհրաժեշտություն է առաջացել, և Սամվելին թողել են ավտոմեքենայի մեջ ու գնացել: Դիմակավորված անձինք մոտեցել են ձեռնաշղթաներով կապված Սամվելին, դուրս հանել ավտոմեքենայից և ծեծի ենթարկել՝ պատճառելով մարմնական վնասվածքներ: Դեպքի մասին նրա փաստաբաններն իմացել են պատահմամբ, երբ ապրիլի 16-ին ԱԺ պատգամավորները տեսակցության են գնացել Սամվելին, և վերջինս մանրամասներ է փոխանցել:

Սամվելն իր պաշտպանին պատմել է, որ բնական կարիքները հոգալու նպատակով ոստիկանության երկու աշխատակիցներն իջել են ավտոմեքենայից, կարճ ժամանակ անց ամբողջությամբ սև հագնված դիմակավորված անձինք, որոնցից Սամվելը 3 հոգու է տեսել, մեքենայից դուրս են հանել տղային, տարել են մի քանի մետր հեռու, խոտածածկ հատվածում ստիպել են ծնկել, գլխից բռնած հարվածել են գետնին, որից հետո հարվածել են ձեռքերով: Ծեծը զուգորդվել է սեռական բնույթի հայհոյանքներով:

Դիմակավորված անձինք պահանջել են, որ Սամվելը կրկնի իր վերաբերյալ սեռական բնույթի հայհոյանքները: Սամվելը հրաժարվել ու ըմբոստացել է, ինչից հետո թքել են տղայի վրա: 

Փաստաբան Վարազդատ Հարությունյանը երեկ հրավիրված մամուլի ասուլիսի ժամանակ ասաց, որ դիմակավորված անձինք իջեցրել են նաև Սամվելի տաբատը, փայտը պահել են ոտքերի արանքում, սակայն որևէ գործողություն չեն կատարել:

Սամվելի նկատմամբ կիրառված բռնության դեպքով քրեական վարույթ չի նախաձեռնվել: Ներքին գործերի նախարարությունից միայն հայտնել են, որ նախարարության ներքին անվտանգության և հակակոռուպցիոն վարչությունում նշանակվել է ծառայողական քննություն՝ ձերբակալված Սամվել Վարդանյանին՝ ձերբակալվածների պահման վայր տեղափոխելու ճանապարհին դիմակավորված անձանց կողմից ծեծի ենթարկելու հայտարարությունների հիման վրա: 

Լուսանկարում՝ Սամվել Վարդանյանը