ԱՄՆ Կոնգրեսի Ներկայացուցիչների պալատի անդամները հավանություն են տվել Ուկրաինային ռազմական օգնություն հատկացնելու մասին օրինագծին: Դրան կողմ է քվեարկել 311 կոնգրեսական, դեմ՝ 112-ը:

Հավանության արժանացած փաստաթուղթը նախատեսում է Ուկրաինային գրեթե 61 միլիարդ դոլարի ռազմական օգնություն։

Այդ գումարից մոտ 23 միլիարդ դոլարը նախատեսված է ամերիկյան զենքի պաշարները համալրելու համար, 11 միլիարդ դոլարը՝ տարածաշրջանում ԱՄՆ գործողությունների ֆինանսավորման համար, ևս մոտ 14 միլիարդ դոլարը՝ սպառազինության և պաշտպանության ժամանակակից համակարգեր գնելու համար: Ուկրաինայի համար սպառազինության նպատակով կհատկացվի 23,2 միլիարդ դոլար։

Բացի այդ, փաստաթուղթն ԱՄՆ նախագահին պարտավորեցնում է Ուկրաինային տրամադրել ATACMS տեսակի հեռահար հրթիռներ։ Սակայն Սպիտակ տան ղեկավարը կարող է հետաձգել այդ որոշումը, եթե համարի, որ հրթիռների փոխանցումը կարող է վնասել Միացյալ Նահանգների ազգային անվտանգության շահերին:

Փաստաթուղթը պետք է ստանա նաև Սենատի հավանությունը, որից հետո այն կստորագրի ԱՄՆ նախագահը։

Ուկրաինայի նախագահ Վլադիմիր Զելենսկին շնորհակալություն է հայտնել Ներկայացուցիչների պալատում երկու կուսակցությունների անդամներին և խոսնակին՝ «կենսական նշանակության այս օրինագծին հավանություն տալու համար»:

I am grateful to the United States House of Representatives, both parties, and personally Speaker Mike Johnson for the decision that keeps history on the right track.

Democracy and freedom will always have global significance and will never fail as long as America helps to…

— Volodymyr Zelenskyy / Володимир Зеленський (@ZelenskyyUa) April 20, 2024

ԱՄՆ Կոնգրեսը անցած աշնանից ի վեր չէր կարողանում հաստատել Ուկրաինային 61 միլիարդ դոլարի ռազմական օգնության հատկացման փաթեթը՝ հանրապետականների և դեմոկրատների միջև տարաձայնությունների պատճառով: Կիևի համար ռազմական օգնության այս փաթեթը ներառված էր «ԱՄՆ ազգային անվտանգության մասին» միասնական օրինագծում, որը հանրապետականները հրաժարվում էին ընդունել՝ դրանում ամերիկյան սահմանի պաշտպանությանն ուղղված միջոցների բացակայության պատճառով:

Այս տարվա ապրիլին մեկ օրինագծի փոխարեն ներկայացվել էր Ուկրաինային, Իսրայելին և Թայվանին օգնության մասին առանձին օրենսդրական նախագծեր, ինչպես նաև «ԱՄՆ ազգային անվտանգության մասին» օրինագիծը, որը վերաբերում է Ուկրաինային օգնության նպատակով ռուսական սառեցված ակտիվների օգտագործմանը, Tiktok-ի արգելափակմանը և Իրանի դեմ նոր պատժամիջոցներին:

Լուսանկարը՝ Ken Cedeno/Reuters