ԵՄ-ն ողջունում է Հայաստանի և Ադրբեջանի միջև ձեռք բերված համաձայնությունը։ Այդ մասին X-ի իր միկրոբլոգում գրառում է արել Եվրոպական խորհրդի նախագահ Շառլ Միշելը։

«Մենք ողջունում ենք Հայաստանի և Ադրբեջանի միջև համաձայնությունը, որը հիմնված է 1991 թվականի Ալմա-Աթայի հռչակագրի վրա՝ երկու երկրների միջև սահմանների սահմանազատման վերաբերյալ: Սահմանների սահմանազատումը, որը հիմնված է յուրաքանչյուր երկրի տարածքային ամբողջականության միանշանակ ճանաչման վրա, դարձել Է Բրյուսելում քննարկումների առանցքային տարր և կարևոր քայլ կծառայի ողջ տարածաշրջանի կարգավորման ու խաղաղ բացման ճանապարհին»,- նշել է Միշելը։

Warmly welcome the agreement between Armenia and Azerbaijan on the 1991 Alma Ata Declaration as the basis for border delimitation between the two countries.

Border delimitation based on the unambiguous recognition of the territorial integrity of each country has been a key…

— Charles Michel (@CharlesMichel) April 20, 2024

Հիշեցնենք, որ ապրիլի 19-ին ՀՀ Արտաքին գործերի նախարարությունը հայտարարություն էր տարածել այն մասին, որ նույն օրը կայացել է Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի ութերորդ հանդիպումը՝ ՀՀ փոխվարչապետ Մհեր Գրիգորյանի և ԱՀ փոխվարչապետ Շահին Մուստաֆաևի նախագահությամբ:

Ըստ այդ հաղորդագրության՝ Սահմանազատման գործընթացի սկզբնական փուլում կողմերը նախնական համաձայնեցրել են սահմանագծի առանձին հատվածները, անմիջականորեն Բաղանիս (ՀՀ) – Բաղանիս Այրում (ԱՀ), Ոսկեպար (ՀՀ) – Աշաղը Ասկիպարա (ԱՀ), Կիրանց (ՀՀ) – Խեյրումլի (ԱՀ) և Բերքաբեր (ՀՀ) – Կըզըլ Հաջիլի (ԱՀ) բնակավայրերի միջև՝ Խորհրդային Միության փլուզման պահի դրությամբ գոյություն ունեցող իրավաբանորեն հիմնավորված միջհանրապետական սահմանին համապատասխանեցնելու նպատակով:

Բացի այդ, կողմերը պայմանավորվածություն են ձեռք բերել, որ սահմանազատման գործընթացում կառաջնորդվեն Ալմա Աթայի 1991 թվականի հռչակագրով, ինչպես նաև կշարունակեն սահմանի բոլոր մնացած հատվածների սահմանազատման գործընթացը՝ ներառյալ անկլավների և էքսկլավների հետ կապված հարցերով:

Լուսանկարը՝ Ադրբեջանի նախագահի մամուլի ծառայության