Հինգ մարզում և Երևան քաղաքում նոտարի թափուր պաշտոնները լրացնելու նպատակով այսօր Արդարադատության նախարարությունն անցկացրեց թեկնածուների որակավորման ստուգման առաջին՝ գործնական խնդիրների լուծման փուլը: Նոտարի թափուր պաշտոններ կան Վանաձորում, Ստեփանավանում, Դիլիջանում, Արտաշատում, Ախուրյանում, Սիսիանում, Կապանում և Երևան քաղաքում: 8 տեղի համար հայտ է ներկայացրել 75 հոգի, սակայն այսօր ներկա էին 70-ը:

Գործնական խնդիրների լուծման փուլն անցկացվեց Փաստաբանական ակադեմիայի համակարգչային լսարաններում, քանի որ Արդարադատության նախարարությունը նման լսարաններ և այդ քանակի համակարգիչներ չունի:

Հիշեցնենք, որ Կառավարությունը 2023թ. նոյեմբերին գրեթե ամբողջությամբ փոփոխել է «Նոտարների թեկնածուների որակավորման ստուգման կարգը»: Այդ նորացված կարգով առաջին անգամ 2024թ. հունվարի 26-ին տեղի ունեցավ որակավորման ստուգման երկրորդ՝ հարցազրույցի փուլը: 

• Կողմնակալ վերաբերմունք, հուշումներ. ինչպես են անցկացվում նոտարի թեկնածուների քննությունները

Գրել էինք, որ այդ ժամանակ գործնական խնդիրների լուծման փուլն իրականացվել էր ձեռագիր տարբերակով, ինչի դեպքում հնարավոր չէր ապահովել թեկնածուների գաղտնիությունը՝ աշխատանքները ստուգելու ժամանակ: Նախարարությունը պնդում էր, թե ապահովել են գաղտնիությունը, մինչդեռ ակնհայտ է, որ ձեռագրերով հնարավոր էր անձանց նույնականացնել:

Մեր հրապարակումից հետո նախարարությունը որոշել է գտնել այլ տարածք և որակավորման ստուգումն իրականացնել համակարգչային եղանակով՝ փորձելով չեզոքացնել հրապարակման մեջ բարձրացված ռիսկերը: 

Որակավորման ստուգումն իրականացնելու համար Արդարադատության նախարարի կողմից ստեղծված հանձնաժողովում, որը կազմված է 8 անդամից, ընդգրկվել են հավասար թվով Արդարադատության նախարարության ներկայացուցիչներ և նոտարներ՝ Նոտարական պալատից: 

Նախորդ որակավորման ստուգման ժամանակ հանձնաժողովի կազմում էր նաև Նոտարական պալատի նախագահը, որը բանավոր փուլի ժամանակ ակնհայտ կողմնակալ վերաբերմունք ուներ Նոտարական պալատի աշխատակից նոտարի թեկնածուի նկատմամբ և ամեն գնով, հուշումներով, բացահայտ աջակցությամբ բանավոր փուլում բարձր միավորներ շնորհեցին վերջինիս, և նա Գեղարքունիքի մարզում նշանակվեց նոտար:

Մեր նյութից հետո ամբողջությամբ փոխվել է նաև հանձնաժողովի՝ Նոտարական պալատի ներկայացուցիչների կազմը: 

Այս անգամ ոչ միայն Նոտարական պալատի նախագահը հանձնաժողովի կազմում չէր, այլև նրա հետ հանձնաժողովի կազմ ընդգրկված մյուս երեք նոտարները: 

Նոտարների որակավորման ստուգման հանձնաժողովի նախագահ, Արդարադատության նախարարության գլխավոր քարտուղար Սիրվարդ Գևորգյանը «Հետքի» հետ զրույցում ասաց, որ այս անգամ առաջադրանքները պարզեցրել են, որպեսզի մասնակիցները հատկացված 3,5 ժամի մեջ տեղավորվեն և կարողանան անցողիկ շեմը հաղթահարել:

Հունվարին անցկացված որակավորման ստուգման ժամանակ գործնական առաջադրանքների փուլին ներկայացած 62 թեկնածուներից անցողիկ շեմը հաղթահարել էր ընդամենը 3 թեկնածու:

Ինչ վերաբերում է մրցակցությանը, ապա ամենաբարձր մրցակցությունը Երևան քաղաքում է՝ նոտարի մեկ թափուր տեղի համար հայտ է ներկայացրել 37 իրավաբան, հաջորդը Արտաշատն է՝ 29, այնուհետև Դիլիջանը՝ 18: Ամենաքիչ դիմումներ ստացվել են Ստեփանավան և Կապան քաղաքների համար՝ համապատասխանաբար 3 և 5 դիմում:

Թե 70 թեկնածուներից քանիսը կհաղթահարի անցողիկ շեմը և կանցնի բանավոր փուլ՝ պարզ կլինի առաջիկայում, երբ ստուգվեն առաջադրանքները: