HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ալավերդիում նշել են քաղաքի ու մետալուրգի օրերը

Երեկ ` հուլիսի 15-ին, Քրիստոսի պայծառակերպության տոնին Ալավերդիում  անցկացվեցին «Ալավերդու օր» և «Մետալուրգի  օր» ավանդական  տոնակատարությունները:  Վերջինիս շրջանակներում  մարզի ղեկավարների և լրագրողների հետ հանդիպման ժամանակ «Վալլեքս» խմբի ընկերությունների նախագահ Վալերի Մեջլումյանը  ուշագրավ հայտարարություն արեց:  Նա ասաց,  որ արդեն եկող տարվա վերջին «Վալլեքսը» կունենա Ղարաբաղի Կաշենի հանքավայրից  արտադրված խտանյութ, որը տեղափոխվելու  է Ալավերդի և ձուլվելու է պղնձաձուլական գործարանում: Վալերի Մեջլումյանը, պատասխանելով «Հետքի» հարցին, նաև հայտնեց, որ  Ալավերդիում «Վալլեքսը» ժամանակակից պղնձաձուլական գործարան կարող է կառուցել 5-7 տարի հետո:

Իսկ մինչ այդ տոնական օրը ալավերդցիների համար հագեցած էր տոնական միջոցառումներով:  Ալավերդու  քաղաքապետ  Արտավազդ Վարոսյանը  վաղ առավոտյան իր աշխատասենյակում  ընդունեց  քաղաքի վաստակաշատ  մի խումբ ալավերդցիների, որոնց  նա գնահատանքի ջերմ  խոսքեր ուղղեց  և հանձնեց նվերներ: Ալավերդու Սուրբ    Գրիգոր Նարեկացի եկեղեցում  Ալավերդու հոգևոր  հովիվ  Տեր Միքայել քահանա Շաղոյանը  Քրիստոսի պայծառակերպության տոնի կապակցությամբ պատարագ մատուցեց հավատացյալ ալավերդցիներին: Պատարագին քահանան   մատուցեց պայծառակերպության տոնի խորհուրդը:  

Ալավերդու քարե կամրջին  հարող  պուրակում նույն  ժամին բացվեց ալավերդցի  ստեղծագործողների ցուցահանդեսը: «Մեր քաղաքի օրը  մեր ստեղծագործողները ամեն տարի հաշվետվություն են տալիս,  թե ինչ են արել տվյալ տարում»,- ասաց  քաղաքապետարանի  մշակույթի և սպորտի  բաժնի վարիչ  Սիլվա Դավթյանը: Ցուցահանդեսին ցուցադրվեցին  ալավերդցի նկարիչներ Ռաֆիկ և Կարեն Կոնինյանների, Դավիթ Ղահրամանյանի, Լյովան Մանուկյանի, Հայկ Սիրադեղյանի, Վարուժան Վարդումյանի և գեղարվեստի դպրոցի ու մանկապատանեկան ստեղծագործողների կենտրոնի աշակերտների  ու աշխատողների նկարները: Սանահին գյուղական թաղամասում  նշվեց  Միկոյան եղբայրների թանգարանի  հիմնադրման 30-ամյակը:  Տոնական օրը  սպորտային միջոցառումներ էին կազմակերպվել   Ալավերդու  Օլեգ Գորբունովի անվան մարզադպրոցում, որտեղ  անցկացվեց մարզադպրոցի հիմնադիր Սերգեյ Շախկուլյանին  նվիրված  բասկետբոլի մրցաշար:  Միմյանց հետ մրցեցին Վանաձորի  և Ալավերդու  բասկետբոլիստները: Մրցապայքարի մեջ մտան նաև Ալավերդու հանդբոլի   վետերանները:     

Տոնակատարության հետ  կապված «Վալլեքսը» պաշտոնական ճաշի էր հրավիրել  Ալավերդի քաղաքի  հիմնարկների ղեկավարներին և  իր առաջավոր աշխատողներին,  որտեղ  150 մարդ  պարգևատրվեցին կենցաղային  իրերով և դրամական պարգևներով:  Տոնակատարության  վերջում «Վալլեքսի» ֆինանսավորմամբ տեղի ունեցավ ճոխ համերգ և  հրավառություն: Համերգին մասնակցեցին Արցախի  պարի պետական  համույթը, Վանաձորի «Հորովել» պարի պետական անսամբլը,  Անդրեն,  Սոնա Շահգելդյանը, Էրիկը  և մի շարք այլ երգիչներ: Մասնակցեցին  նաև Ալավերդու  պարի թատրոնի սաները: Ալավերդցիները  իրենց  հիացմունքը հատկապես դրսևորեցին  Արցախի պարի պետական  համույթի  բարձր կատարողականության  նկատմամբ:

Տոնական միջոցառումների ընթացքում «Հետքի» հարցմանը, թե որն է համարում Ալավերդիում ամենահրատապ լուծում պահանջող խնդիրը,  քաղաքապետ Արտավազդ Վարոսյանը պատասխանեց, որ  ամենակարևոր խնդիր առանձնացնելը արդարացի չի համարում, քանի որ դա կնշանակի մի շարք այլ կարևոր խնդիրների թերագնահատում: «Բայց իհարկե Ալավերդիում  առաջնահերթ է մարդկանց  աշխատանքով ապահովելու խնդիրը, որը հնարավորություն կտա լուծել  շատ այլ սոցիալական խնդիրներ»,- ասաց քաղաքապետը:  Լոռու մարզպետ Արթուր Նալբանդյանը կարևորեց աշխատողների պարգևատրումը. «Բոլոր մարդիկ էլ իրենց աշխատանքում կարիք ունեն գնահատվելու և մենք մեր պարտքն ենք համարում վաստակ ունեցող մարդկանց  անպայման գնահատելու: Սա կատարում ենք տոնից տոն` հաշվի առնելով մասնագիտական տոնը»:

Արթուր Նալբանդյանը կարևորեց  նաև  մարզի արդյունաբերական ձեռնարկությունների մասնակցությունը  մարզի զարգացման խնդիրներում. «Լոռու մարզում չնայած ունենք 105 գյուղական և ընդամենը 8 քաղաքային համայնքեր, բայց մարզը կոչվում է արդյունաբերական մարզ:  Արդյունաբերական արտադրանքի 80 տոկոսից ավելին ապահովում է «Էյ-Սի-Փի» ընկերությունը: Հիմա մենք լուրջ ուշադրություն ենք դարձնում Քիմպրոմի զարգացմանը: Համոզված եմ, որ  Քիմպրոմը  հանրապետության մոտ 70 տոկոս պարարտանյութի ծավալը կփակի, և ինձ թվում է՝ 2013 թ.-ի գարնանից սկսած կսկսի արագ տեմպերով զարգանալ: Արդյունաբերությունը արագ տեմպերով զարգանում է նաև մարզի Ստեփանավան քաղաքի Արմանիսի հանքավայրում: Այս 3  քաղաքների  արդյունաբերական  ձեռնարկությունները  էական ազդեցություն կունենան  մարզի զարգացման գործում»:

«Ալավերդու  օր»  և «Մետալուրգի օր» տոնակատարություններին ներկա էր  նաև ԱԺ պատգամավոր, ալավերդցի Էդուարդ Շերմազանովը, որին Ալավերդու հիմնախնդիրների հետ կապված «Հետքն» ուղղեց իր հարցերը:

-Ինչպե՞ս եք տեսնում Ալավերդու ապագան:

-Բնականաբար, ինչպես յուրաքանչյուր ալավերդցի, ես նույնպես ուզում եմ իմ քաղաքի ապագան տեսնել վառ:  Ամենակարևորը, որ պղնձաձուլական գործարանը աշխատում է, և մարդիկ  աշխատանք  ունեն: Կարևորում եմ, որ տեղական իշխանությունները կարողանան իրենց վրա դրված պարտականությունների  կատարմամբ  խթանեն նոր աշխատատեղի ստեղծմանը: Տասը տարվա կտրվածքով  այսօրվա Ալավերդին նախկինի հետ անհամեմատելի է: Ալավերդին միշտ ունեցել է հրաշալի ավանդույթներ, և այդ իմաստով մենք մաքսիմալիստ ենք և շատ ավելի ենք ուզում և դրան արժանի ենք: Կուզենայի Ալավերդիում տեսնել ավելի զարգացած  մարզական կյանք և  գիտակրթական համակարգ:

-Նախագահ Սերժ Սարգսյանը ալավերդցիների հետ ԱԺ նախընտրական իր հանդիպման ժամանակ  երկրի տնտեսական կյանքում  հանքահումքային ոլորտի զարգացմանը զուգընթաց կարևորեց բնապահպանական  խնդիրների լուծումը: Ինչպե՞ս եք գնահատում  նախագահի պահանջի կատարումը  Ալավերդիում:

-Եվ վարչապետը և նախագահը  միշտ էլ կարևորել են բնապահպանական խնդիրները: Մինչ նախընտրական քարոզչությունը, երբ մենք վարչապետի հետ Ալավերդիում էինք, այստեղ մի շարք  ՀԿ-ներ առաջարկեցին  կազմակերպել բնապահպանական  քննարկում` կառավարության մասնակցությամբ: Հանրապետական կուսակցությունը առաջարկեց այդ քննարկումն անել հենց Ալավերդիում` շահագրգիռ կողմերի հետ միասին: Ալավերդու ապագան ես տեսնում եմ արդյունաբերության զարգացման մեջ` բնապահպանական չափանիշների պահպանմամբ:  Այս իմաստով մենք պետք է վերցնենք աշխարհի լավագույն փորձը: Որպեսզի դիլետատ չլինենք, մենք պետք է դա լրջորեն քննարկենք: Դրա  քաղաքական կամքը մենք ունենք:  

-Տարիներ շարունակ Ալավերդիում չի ուսումնասիրվում  էկոլոգիական ազդեցությունները բնակչության առողջության վրա: Հնարավոր համարու՞մ եք Ձեր մասնակցությամբ խնդրի լուծումը:

-Ես խնդիր չեմ տեսնում հարցը բարձրացնելու, պարզապես կարևոր ՀԿ-ներ են այդ ոլորտում գործում, եթե  ներկայացվեն փաստեր, ես պատրաստ եմ աջակցության, երկրորդն էլ՝  ԱԺ-ում  գործում են թե բնապահպանության և  թե  առողջապահության մշտական հանձնաժողովներ: Ես իմ գործընկերների ուշադրությունը կհրավիրեմ այդ հարցերի վրա: Եթե հարկ լինի, այդ հանձնաժողովների նախագահների հետ կայցելենք Ալավերդի` հարցը տեղում քննարկելու համար: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter