Վաղարշապատի թիվ 4 հիմնական դպրոցի 3-8-րդ դասարանի աշակերտները, կրծքին ամրացրած Գեորգևյան ժապավենը, փոխտնօրենի և մի խումբ ուսուցիչների ուղեկցությամբ, այսօր՝ մայիսի 9-ի առավոտյան դպրոցից քայլելով շարժվեցին դեպի Հայրենական մեծ պատերազմի հուշահամալիր: Երեխաների ձեռքին Հայրենական պատերազմի մասնակիցների նկարներն էին և սպիտակ փուչիկներ: «Ինչու սպիտակ փուչիկներ հարցին» փոխտնօրեն Ռուզաննա Ղազարյանը պատասխանում է՝ կողքից ասել են, որ «կարմիրը շատ ռուսական կլինի»: Քայլերթի աբողջ ճանապարհին հնչում էին «День Победы» և ռուսական այլ երգեր:

Միջոցառման կազմակերպիչ, թիվ 4 հիմնական դպրոցի փոխտնօրեն Ռուզաննա Ղազարյանն առաջնորդում էր քայլերթը: Նրանից հետաքրքրվեցինք՝ երեխաները գիտե՞ն, թե այսօր, բացի Հայրենական Մեծ պատերազմում հաղթանակը, հայ ժողովուրդն ինչ տոն է նշել, և ինչու այս միջոցառմանը չկա եռատոնը բնութագրող որևէ այլ տարր:

«Այս օրը միայն ասոցացվել է Համաշխարհային երկրորդ պատերազմում հայ ժողովրդի մասնակցության, հայ ժողովրդի պանծալի ծառայության և հաղթանակի տոն: Իհարկե, իրենք գիտեն, որ Արցախի, Շուշիի տոնն է, բայց որպես պետական, պաշտոնական տոն մենք չենք նշում»,-ասում է Ռուզաննա Ղազարյանը:

«Նման հրահա՞նգ է եղել, որ միայն Հայրենական մեծ պատերազմում հաղթանակի տոնը նշեն, թե դպրոցն է այդպես որոշել»,-հարցրինք Ռ. Ղազարյանին։ Նա ասաց, որ այս միջոցառումն իր նախաձեռնությունն է, և այդտեղ հակահայկական որևէ տարր չկա: Նշեց, որ սա ևս մեր պատմությունն է, որը պետք է հիշել:

«Այսօր Շուշիի տոնը որևէ մեկը նշե՞լ է, Երևանը նշո՞ւմ է, պետությունը նշու՞մ է: 800 երեխա ազգագրական պարերով պարացրել եմ Հանրապետության հրապարակում Շուշիի ազատագրման օրը, Սարդարապատի 100-ամյակին ենք պատրաստվել: Հիմա չենք նշում»,-ասաց Ռուզաննա Ղազարյանը՝ հավելելով, որ իրենք չեն կարող նշել մի տոն, որը պետական մակարդակով չի նշվում:

Քայլերթի ժամանակ ուսուցիչներին մոտեցավ մի տղամարդ և ներկայացավ որպես դպրոցներից մեկում աշխատող զինղեկ: Նա նկատողություն արեց, որ երեխաների հագուստին փակցված է Գեորգևյան ժապավենը, իսկ ձեռքներին խորհրդային տարիների հերոսներն են, եւ ոչ մի լուսանկար՝ մերօրյա հերոսներից:

Ռուզաննա Ղազարյանն ասաց, որ հասկանում են մտահոգությունը, սակայն այդպես է որոշվել տոնը նշել: «Մենք դպրոց ենք, ոչինչ չենք կարող անել»,-ասաց փոխտնօրենը։ Ի պատասխան՝ զինղեկ ներկայացած անցորդը նշեց, թե ինքը ևս դպրոցում է աշխատում և որևէ հրահանգ իրեն չի կարող հետ պահել հայ ժողովրդի հաղթանակները նշելուց:

Դպրոցականները հասան Հայրենական մեծ պատերազմի հաղթանակի հուշահամալիր եւ քիչ հեռու կանգնեցին։ Պարզվեց՝ Վաղարշապատի համայնքապետարանի ներկայացուցիչներին էին սպասում, որ միասին մոտենան անմար կրակին և ծաղիկներ խոնարհեն:

Երբ համայնքի ղեկավարի ժամանակավոր պաշտոնակատար Արսեն Պետրոսյանը և համայնքապետարանի այլ ներկայացուցիչներ մոտեցան հուշահամալիրին, Ռուզաննա Ղազարյանը երեխաների հետ նրանց ընդառաջ գնաց:

Վաղարշապատի համայնքապետարանի լրատվական բաժնից ասացին, որ առավոտյան համայնքապետարանի ներկայացուցիչները ծաղիկներ են խոնարհել նաև արցախյան պատերազմի մասնակիցներին նվիրված հուշակոթողի մոտ, իսկ երեխաների մասնակցությամբ կազմակերպված միջոցառման հետ որևէ կապ չունեն: