Արտաշատ համայնքի «Քաղաքացիական պայմանագիր» խմբակցության ավագանու անդամ Նարեկ Բաղդասարյանի ընկերությունը վերջին երկու տարվա ընթացքում մոտ 723 մլն դրամի ճանապարհաշինական սուբվենցիոն ծրագրերի հաղթող է եղել Արտաշատ համայնքում: Համայնքապետարանում որևէ խնդիր չեն տեսնում, ուղղակի վկայակոչում են «Գնումների մասին» օրենքի այն դրույթը, ըստ որի՝ գնումների մասնակիցները հավասար են:

Նարեկ Բաղդասարյանը իշխող «Քաղաքացիական պայմանագիր» կուսակցության անդամ է: 2021թ. դեկտեմբերի 5-ի՝ Արտաշատի ՏԻՄ ընտրությունների ժամանակ զբաղեցրել է կուսակցության համամասնական ցուցակի 26-րդ տեղը: Ինքնաբացարկների և մանդատները վայր դնելու շնորհիվ Ն. Բաբայանը Արտաշատի ավագանու մանդատը ստացել է 2022թ. մարտի 17-ին:

Հայաստանում իշխանափոխությունից հետո Նարեկ Բաղդասարյանը երկու ընկերություն է ստեղծել և սկսել է ակտիվ մասնակցել գնումներին, փորձել է մուտք գործել հանքարդյունաբերություն:

Մասնավորապես՝ 2020թ. փետրվարի 3-ին ստեղծվել է «Գարանտ Կապիտալ Ստրոյ» ՍՊԸ-ն, որի միակ սեփականատերը Նարեկ Բաղդասարյանն է: Վերջինս նաև ընկերության տնօրենն է:

Ինչպես արդեն նշել ենք, Նարեկ Բաղդասարյանն Արտաշատի ավագանու անդամ է դարձել 2022թ. մարտի 17-ին: Դրանից մեկ օր առաջ՝ մարտի 16-ին, ավագանին որոշել է տալ համաձայնություն՝ 2022թ. պետական բյուջեից սուբվենցիա ստանալու նպատակով: Եղել է սուբվենցիոն 8 հայտ, որոնց թվում՝ Արտաշատ համայնքի բնակավայրերի փողոցների նորոգման, ասֆալտապատման աշխատանքների իրականացումը:

Այդ սուբվենցիոն ծրագրի շրջանակներում Արտաշատ համայնքի յոթ՝ Նորաշեն, Նարեկ, Վերին Արտաշատ, Մրգավան, Դալար, Ազատավան, Մխչյան գյուղերի ճանապարհների ասֆալտապատման նպատակով 2022թ. հոկտեմբերի 14-ին Արտաշատի համայնքապետարանը պայմանագիր է կնքել «Գարանտ Կապիտալ Ստրոյ» ՍՊԸ-ի հետ: Պայմանագրի գինը 595 մլն դրամ է եղել, սակայն աշխատանքների կատարման վերջնարդյունքում փաստացի վճարվել է 589 մլն 831 հազ. դրամ: Գնի 65%-ը վճարվել է համայնքային, իսկ 35%-ը՝ պետական բյուջեից:

Արտաշատի համայնքապետարանի գնումների բաժնի պետի ժամանակավոր պաշտոնակատար Փայլակ Հակոբյանը «Հետք»-ին ասաց, որ մոտ 5 մլն դրամի չափով պակաս վճարումը պայմանավորված է ընկերության խնայողություններով:

Արտաշատի ավագանին 2022թ. հոկտեմբերի 12-ին որոշել է նաև համաձայնել համայնքի ղեկավարի առաջարկությանը՝ 2023թ. ներկայացվող համայնքի սոցիալական և տնտեսական ենթակառուցվածքների զարգացմանն ուղղված սուբվենցիոն ծրագրերին, որտեղ ևս ճանապարհաշինական բաղադրիչ կա:

Ավագանու այս նիստին արդեն մասնակցել է նաև Նարեկ Բաղդասարյանը և կողմ է քվեարկել սուբվենցիոն ծրագրի հայտերի ֆինանսավորմանը:

Սուբվենցիոն ծրագրի շրջանակներում, 2023թ. նոյեմբերի 7-ին Արտաշատի համայնքապետարանը Մասիս, Ազատավան, Ջրաշեն բնակավայրերի փողոցների նորոգման, ասֆալտապատման աշխատանքների կատարման պայմանագիր է կնքել «Գարանտ Կապիտալ Ստրոյ» ՍՊԸ-ի հետ՝ մոտ 205 մլն 558 հազ. դրամ արժեքով: Շինաշխատանքները դեռ չեն ավարտվել, և մինչ այժմ ընկերությանը վճարվել է մոտ 133 մլն 613 հազ. դրամ: Այս ծրագրով ևս 65%-ը ֆինանսավորվում է համայնքային բյուջեից, իսկ 35%-ը՝ պետական:

Աջից առաջինը՝ Արտաշատ համայնքի ղեկավարը

Կուսակցական և ընկերական կապերն օգտագործվել են նաև Արարատի մարզպետարանում: 2023թ․-ին ընթացքում Արարատի մարզպետարանի աշխատակազմը մոտ 109 մլն դրամի պայմանագիր է կնքել Արտաշատի ավագանու անդամ Նարեկ Բաղդասարյանին պատկանող  «Գարանտ Կապիտալ Ստրոյ» ՍՊԸ-ի հետ՝ Արտաշատ համայնքում շինաշխատանքներ իրականացնելու նպատակով: Պայմանագրերը կնքելուց հետո մարզպետարանը, որպես պատվիրատու, իր իրավունքներն ու պարտականությունները համաձայնագրով փոխանցել է Արտաշատի համայնքապետարանին: Նմանատիպ կետ նախատեսված է եղել նաև պայմանագրով:

Արարատի մարզպետարանի անունից պայմանագրերը կնքել է աշխատակազմի գլխավոր քարտուղար Արթուր Մկրտչյանը: Նա ևս Արտաշատ համայնքի ավագանու անդամ է: Իսկ Արթուր Մկրտչյանի հայրը՝ Սուրեն Մկրտչյանը, Արտաշատ համայնքի ղեկավարի տեղակալն է:

Հարկ է նշել, որ Արթուր Մկրտչյանը ևս «Քաղաքացիական պայմանագիր» կուսակցության անդամ է:

2023թ. հունիսի 16-ին Արարատի մարզպետարանի և «Գարանտ Կապիտալ Ստրոյ» ՍՊԸ-ի միջև կնքվել է «Արտաշատ քաղաքի մանկապատանեկան համալիր մարզադպրոց» ՀՈԱԿ-ի տարածքի բարեկարգման աշխատանքների կատարման պայմանագիր՝ 68 մլն 853 հազ․ դրամ գնով:

Օրեր անց՝ հունիսի 26-ին, նույն կողմերի միջև կնքվել է այդ մարզադպրոցի նստատեղերի ձեռքբերման և տեղադրման պայմանագիր, որի գինը մոտ 26 մլն 429 հազ. դրամ է եղել:

Նշենք, որ այդ պայմանագրերից 3 ամիս անց՝ սեպտեմբերին, կողմերը կնքել են համաձայնագիր, որով մարզպետարանի իրավունքներն ու պարտականությունները փոխանցվել են Արտաշատի համայնքապետարանին:

Հունիսի 26-ին Արարատի մարզպետարանն ու «Գարանտ Կապիտալ Ստրոյ» ՍՊԸ-ն ևս մեկ պայմանագիր են կնքել՝ Արտաշատ քաղաքի մանկապատանեկան համալիր մարզադպրոց ՀՈԱԿ-ի ֆուտբոլի փոքր խաղադաշտի կառուցման նպատակով: Պայմանագրի գինը կազմել է 16 մլն 750 հազ. դրամ:

Երեք պայմանագրերն էլ կնքվել են «Հրատապ բաց մրցույթ» ընթացակարգով:

Ավագանու անդամին պատկանող «Գարանտ Կապիտալ Ստրոյ» ՍՊԸ-ի հետ 2022-2023թթ. պայմանագրեր է կնքել նաև Տարածքային կառավարման և ենթակառուցվածքների նախարարության Ջրային կոմիտեն՝ 70 մլն 400 հազ. դրամ պայմանագրային արժեքով:

Նարեկ Բաղդասարյանը «Գարանտ Կապիտալ Ստրոյ» ՍՊԸ-ից, որպես շահաբաժին, 2023թ. ընթացքում ստացել է մոտ 43 մլն դրամի եկամուտ: Իր ընկերությունից 900 հազ. դրամ ստացել է, որպես աշխատավարձ, իսկ 17 մլն 937 հազ․ դրամ՝ վարձակալության դիմաց ստացված գումար:

«Գարանտ Կապիտալ Ստրոյ»-ը միակ ընկերությունը չէ, որտեղ մասնակցություն ունի Նարեկ Բաղդասարյանը: 2018թ. մայիսի 16-ին իրավաբանական անձանց պետական ռեգիստրում գրանցվել է «Ուրալ Արնաշ Ստրոյ» ՍՊԸ-ի հայաստանյան ներկայացուցչությունը, որի ղեկավարը Ն. Բաղդասարյանն է:

Եկատերինբուգում 2013թ․-ին գրանցված այս ընկերության հիմնադիրն ու տնօրենը Նարեկ Բաղդասարյանն է: Հիմնական գործունեությունը ալկոհոլային խմիչքների առեւտուրն է: Բաց աղբյուրներում առկա տվյալների համաձայն՝ ընկերությունն ունի մեկ աշխատող, այսինքն՝ միայն տնօրենն է:

Ընկերությունը փորձել է Հայաստանում զբաղվել հանքարդյունաբերությամբ: Շիրակի մարզի Ամասիա համայնքի ղեկավարի 2020թ. փետրվարի 3-ի որոշմամբ համայնքային սեփականություն հանդիսացող 6,57 հա գյուղատնտեսական նշանակության և 2,27 հա արդյունաբերության ու ընդերքօգտագործման հողամասերը ընդերքի հետախուզական աշխատանքներ իրականացնելու նպատակով, 2 տարի ժամկետով վարձակալության է հանձնվել «Ուրալ Արնաշ Ստրոյ» ՍՊԸ-ին՝ տարեկան 480 հազ. դրամ վարձավճարով: Սակայն ընկերությանը չի հաջողվել դրական եզրակացություն ստանալ և կավ արդյունահանել Ամասիա համայնքի Ջրաձոր բնակավայրից: Շրջակա միջավայրի վրա ազդեցության փորձաքննական կենտրոնը բացասական եզրակացություն է տվել: