Վրաստանի խորհրդարանը երրորդ և վերջնական ընթերցմամբ ընդունել է «Օտարերկրյա ազդեցության թափանցիկության մասին» օրինագիծը։ Այդ մասին փոխանցում են վրացական լրատվամիջոցները։

Օրինագծի երրորդ ընթերցման ժամանակ դրան կողմ է քվեարկել 84 պատգամավոր։ Դեմ քվեարկած պատգամավորների թիվն էլ 30 է: Օրենսդրական նախագծի համաձայն՝ հասարակական կազմակերպությունները և ԶԼՄ-ները, որոնց արտասահմանյան ֆինանսավորումը կազմում է տարեկան եկամտի ավելի քան 20 տոկոսը, պետք է գրանցվեն որպես «օտարերկրյա ուժի շահերն իրականացնող կազմակերպություններ»:

Նրանք պետք է լրացնեն տարեկան ֆինանսական հայտարարագիր, իսկ այն կառույցները, որոնք կփորձեն խուսափել դրանից, կվճարեն 25 հազար լարիի չափով (մոտ 9 500 ԱՄՆ դոլար) տուգանք:

Խորհրդարանում վիճահարույց այս օրինագծի քննարկումը տեղի է ունեցել Թբիլիսիի կենտրոնում տեղի ունեցած զանգվածային ցույցերի ֆոնին, որոնք հաճախ ավարտվում են ցուցարարների և ոստիկանության բախումներով և ձերբակալություններով:

Հենց խորհրդարանում երեքշաբթի օրը կրկին գործի էր դրվել, այսպես կոչված, դեղին մակարդակը։ Նիստին թույլատրվում էր մասնակցել միայն հեռուստաալիքների նկարահանող խմբերին։ Սա այն դեպքում, երբ տպագիր և ինտերնետ լրատվամիջոցների լրագրողները այդպես էլ չկարողացան մասնակցել նիստին։

Նույն կանոնները գործում էին նաև օրինագծի առաջին և երկրորդ ընթերցմամբ քննարկումների ժամանակ։

🇬🇪 A fight broke out in the Georgian parliament between ruling party MPs and opposition members during the discussion of the law on "foreign agents", local media report.

The parliament session was interrupted. pic.twitter.com/MK8uPwlDJO

— NEXTA (@nexta_tv) May 14, 2024

Օրինագծի քննարկումը դարձյալ անցել է թեժ մթնոլորտում։ Ավելին, ծեծկռտուք է եղել իշխանական և ընդդիմադիր պատգամավորների միջև։ Բախման պատճառ է դարձել Լևան Խաբեիշվիլիի ելույթը, որը Վրաստանի ամենախոշոր ընդդիմադիր կուսակցության՝ «Միացյալ ազգային շարժման» առաջնորդն է։ Վերջինս իր ելույթում մեղադրանքներ էր ներկայացրել իշխող կուսակցությունից Դմիտրի Սամխարաձեի հասցեին։ Վերջինս, ի պատասխան, շիշ է նետել, ինչի պատճառով էլ ծեծկռտուք է սկսվել։

Mtavari TV-ն գրում է, որ դրանից հետո պատգամավոր Ռիմա Բերաձեն թղթերի կապոց է նետել պատգամավոր Պաատա Մանջգալաձեի ուղղությամբ։ Դրա պատճառով նիստը ժամանակավորապես դադարեցվել էր, իսկ ավելի ուշ՝ վերսկսվել։

Լուսանկարը՝ Վրաստանի խորհրդարանի մամուլի ծառայության