Ռուս զինվորականները Խարկովի մարզի Վովչանսկ քաղաքի հյուսիսային հատվածում ընթացող մարտերի ընթացքում սկսել են գերեվարել տեղի բնակիչներին։ Նման հայտարարություն է արել Ուկրաինայի ներքին գործերի նախարար Իգոր Կլիմենկոն:

Նախարարի պնդմամբ՝ ՌԴ զորքերը, որոնք փորձում են ամրապնդվել քաղաքի տարածքում, խաղաղ բնակիչներին թույլ չեն տալիս տարհանել, մարդկանց առևանգում են և քշում նկուղներ։

«Հայտնի է ռուս զինվորականների կողմից քաղաքացիական անձանց առաջին գնդակահարությունների մասին։ Մասնավորապես, Վովչանսկի բնակիչներից մեկը փորձել է փախչել, հրաժարվել է կատարել զավթիչների հրամանները. ռուսաստանցիները նրան սպանել են»,- տելեգրամյան իր ալիքում գրել է Կլիմենկոն։

Ուկրաինայի Խարկովի մարզի ազգային ոստիկանության քննիչները քրեական վարույթ են սկսել պատերազմի օրենքների և սովորույթների խախտման հոդվածով:

Կլիմենկոն հավելել է, որ ոստիկանները շարունակում են աշխատել Վովչանսկում, չնայած ինտենսիվ մարտական բախումներին, և փորձում ապահովել բնակիչների հետագա տարհանումը:

Ռուսական զորքերը Ուկրաինայի Խարկովի մարզում հարձակողական գործողություններ են սկսել մայիսի 10-ին: Ուկրաինայի զինված ուժերի գլխավոր շտաբից մայիսի 13-ին հայտնել էին, որ ռուս զինվորականները «մարտավարական հաջողություն ունեն» Վովչանսկի համար մղվող մարտերում: Հաջորդ օրը Ուկրաինայի ԶՈւ-ն հայտարարեց, որ ուկրաինական ուժերը Վովչանսկի հատվածում նահանջել են «առավել շահավետ դիրքեր»։

Լուսանկարը՝ Reuters գործակալության