Հայաստանի Հանրապետության ԱԳ նախարար Արարատ Միրզոյանը հանդիպում է ունեցել Գերմանիայի Դաշնային Հանրապետության ԱԳ նախարար Անալենա Բերբոքի հետ: Այս մասին հայտնում է Հայաստանի արտաքին քաղաքական գերատեսչության մամուլի ծառայությունը։

«Զրուցակիցները գոհունակությամբ արձանագրել են երկու երկրների միջև բարձր մակարդակի քաղաքական երկխոսության ակտիվ դինամիկան՝ ընդգծելով ինչպես երկկողմ, այնպես էլ ԵՄ հարթակում գործընկերության խորացման միջոցով ընձեռնվող հնարավորությունները։

Անդրադարձ է կատարվել Հայաստանում ժողովրդավարության և օրենքի գերակայության ամրապնդման ուղղությամբ իրականացվող հաստատակամ քայլերին և այս ուղղությամբ միջազգային գործընկերների հետ փոխգործակցության հարցերին: «Հայաստանի կառավարությունը հանձնառու է թե’ ժողովրդավարական բարեփոխումների, թե’ խաղաղության օրակարգին, և մեր միջազգային գործընկերների շարունակական աջակցությունը կարևոր է շոշափելի առաջընթացի ապահովման համար»։

Մտքեր են փոխանակվել նաև տարածաշրջանային տնտեսական ծրագրերի, դրանցում ՀՀ ներգրավվածության հարցերի շուրջ, այդ թվում՝ վերականգնվող էներգիայի բնագավառում։

Շարունակելով տարածաշրջանային թեմաների վերաբերյալ քննարկումը՝ Հայաստանի և Գերմանիայի ԱԳ նախարարներն անդրադարձ են կատարել Հարավային Կովկասում անվտանգային իրավիճակին։ Նախարար Միրզոյանն իր գործընկերոջն է ներկայացրել Հայաստան-Ադրբեջան հարաբերությունների կարգավորման գործընթացի վերջին զարգացումները, այդ թվում՝ Ալմաթիում խաղաղության պայմանագրի նախագծի շուրջ կայացած բանակցությունները»,- ասված է պաշտոնական հաղորդագրությունում։

Հանդիպմանը անդրադարձել է նաև Գերմանիայի արտգործնախարարությունը։

«Հայաստանն ու Ադրբեջանը խաղաղության հասնելու պատմական հնարավորություն ունեն։ Իր հայ գործընկերոջ՝ Արարատ Միրզոյանի հետ հանդիպմանը Անալենա Բերբոքն ընդգծել է Գերմանիայի պատրաստակամությունը՝ շարունակելու աջակցությունը խաղաղ գործընթացին։ Հիմա շատ կարևոր է շարունակել երկխոսությունը»,-  ասված է Գերմանիայի ԱԳ նախարարության X սոցիալական ցանցում տեղադրված հաղորդագրությունում։

#Armenia and #Azerbaijan have a historic opportunity for peace. In talks with her 🇦🇲 counterpart @AraratMirzoyan , @ABaerbock emphasised Germany's willingness to continue supporting the peace process. It is crucial to continue the dialogue now.

— GermanForeignOffice (@GermanyDiplo) May 17, 2024