Ազգային ժողովի փոխնախագահ Էդուարդ Շարմազոնովը այսօր ընդունեց Կանադայի համայնքների պալատի անդամներ, Կանադա-Հայաստան խորհրդարանական բարեկամության խմբի փոխնախագահներ Ջիմ Կարիջիանիսին և Ալեքսանդր Բուլրիսին:

Էդուարդ Շարմազանովը, ի դեմս համայնքների պալատի ներկայացուցիչների, երախտագիտություն հայտնեց Կանադային' Հայոց ցեղասպանությունը ճանաչելու, տարիների հայանպաստ գործունեության համար: Նա կարևորեց նախագահական ընտրություններին դիտորդական առաքելությամբ մասնակցելու նպատակով Ղարաբաղ մեկնող կանադացի պատգամավորների այցն Արցախի ժողովրդի համար:

Կանադացի հյուրերը շեշտեցին, որ չնայած իրենց այցին շատերը, մասնավորապես ադրբեջանցիներ դեմ են եղել, բայց իրենք մեծ ցանկություն ունեն ականատես լինելու ժողովրդավարության կայացմանը Ղարաբաղում: Նրանք հույս հայտնեցին, որ Ղարաբաղում նախագահական ընտրությունները կանցնեն բարձր մակարդակով, և ներկայացրին իրենց գաղափարը' Կանադա վերադառնալուն պես նախաձեռնել «Լեռնային Ղարաբաղի ընկերներ» կոչվող խումբ: Է.Շարմազանովը նշեց, որ դա փայլուն գաղափար է և առարկայական օրինակ, թե ինչպես կարելի է աջակցել երիտասարդ ժողովրդավարական երկրին:

Կանադացի խորհրդարանականների խոսքերով՝ Կանադայում ապրող շուրջ հարյուր հազար հայերը շատ ակտիվ են, հայկական համայնքը երկրորդ-երրորդ տեղում է իր ազդեցիկությամբ, «հայկական կրակը միշտ վառ է»:

Կանադայի համայնքների պալատի անդամները խոսեցին Հայաստանում դեսպանատուն ունենալու անհրաժեշտությունից: Ի պատասխան' Է. Շարմազանովը նշեց, որ հայկական կողմը միայն շահագրգռված է էլ ավելի բարձր մակարդակի հարաբերություններով: Է. Շարմազանովն ասաց, որ Հարավային Կովկասում Հայաստանն առաջինն է եղել, որ Օտտավայում բացել է դեսպանատուն, ինչը վկայում է Հայաստանի համար հայ-կանադական հարաբերությունների կարևորության մասին: Այս մասին հայտնում է ԱԺ հասարակայնության և տեղեկատվության միջոցների հետ կապերի վարչությունը: