HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ծեծկռտուք և սպանության փորձ սուպերմարկետի ավտոկայանատեղիում․ 1 անձ կալանավորվել է

Քննչական կոմիտեն հայտնում է, որ պարզվել են Երևան քաղաքում գործող սուպերմարկետի կայանատեղիում տեղի ունեցած սպանության փորձի դեպքի հանգամանքները։

«Նախաքննության ընթացքում իրականացված անհրաժեշտ քննչական և վարութային գործողությունների արդյունքում ձեռք բերված փաստական տվյալներով հիմնավորվել է, որ 2024 թվականի հունվարի 8-ին՝ ժամը 09:43-ի սահմաններում, Երևան քաղաքի Ծարավ Աղբյուր փողոցում գործող սուպերմարկետի ավտոկայանատեղիից 32-ամյա վարորդի կողմից BMW մակնիշի ավտոմեքենան դուրս հանելու ժամանակ, սուպերմարկետի՝ արկղեր տեղափոխող 42-ամյա աշխատակցին տեղեկացրել են որ իր կողմից տեղափոխվող արկղերով բեռնված քարշակը խանգարում է ավտոմեքենային դուրս գալ, ինչին ի պատասխան՝ վերջինս անպարկեշտ արտահայտություն է հնչեցրել։ Հիշյալ ավտոմեքենայի վարորդի կնոջ 57-ամյա հայրը, լսելով իր փեսայի հասցեին ուղղված արտահայտությունը, փորձել է սաստել 42-ամյա տղամարդուն՝ քաշքշելով, ձեռքերով և ոտքերով հարվածելով վերջինիս մարմնի տարբեր մասերին։ 32-ամյա տղամարդը, տեսնելով այս ամենը, դուրս է եկել ավտոմեքենայից և ինքը ևս սկսել է հարվածներ հասցնել պահեստի աշխատակցին։

Վիճաբանությունն ավարտվելուց հետո պահեստի հիշյալ աշխատակիցը թիկունքից մոտեցել է 32-ամյա տղամարդու կնոջ հորը և, վերջինիս ապօրինաբար կյանքից զրկելու ուղղակի դիտավորությամբ, ծակող-կտրող առարկայով հարվածներ է հասցրել նրա կրծքավանդակին՝ առողջությանը պատճառելով կյանքին վտանգ սպառնացող մարմնական վնասվածքներ։ Սակայն հանցագործությունը, նրա կամքից անկախ հանգամանքներով, չի իրագործվել բժշկական օգնության արդյունքում հնարավոր է եղել փրկել տղամարդու կյանքը:

Երբ 32-ամյա տղամարդը փորձել է խոչընդոտել սուպերմարկետի 42-ամյա աշխատակցի այդ գործողություններին, վերջինս ծակող-կտրող առարկայով դիտավորությամբ հարվածներ է հասցրել նաև նրա մարմնի տարբեր մասերին՝ առողջությանը պատճառելով միջին ծանրության վնաս։

Ձեռք բերված բավարար փաստերի հիման վրա սուպերմարկետի պահեստի աշխատակցին մեղադրանք է ներկայացվել՝ Քրեական օրենսգրքի 44-155-րդ հոդվածի 1-ին մասով և 167-րդ հոդվածի 2-րդ մասի 8-րդ կետով, 57–ամյա տղամարդուն և նրա կնոջ հորը՝ ՀՀ քրեական օրենսգրքի 195-րդ հոդվածի 2-րդ մասի 5-րդ կետով։

42-ամյա տղամարդու նկատմամբ որպես խափանման միջոց է կիրառվել կալանքը, իսկ մյուս երկու մեղադրյալների նկատմամբ՝ բացակայելու արգելքը։

Նախաքննությունն ավարտվել է, քրեական վարույթի նյութերը, մեղադրական եզրակացությամբ, ուղարկվել են հսկող դատախազին՝ հաստատելու և դատարան ուղարկելու համար»,- ասված է հաղորդագրության մեջ։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter