Վարչապետ Նիկոլ Փաշինյանին ծննդյան օրվա առթիվ ՌԴ նախագահ Վլադիմիր Պուտինը շնորհավորական ուղերձ է հղել: Այս մասին հաղորդում է կառավարության մամուլի ծառայությունը։

ՌԴ նախագահ Վլադիմիր Պուտինի ուղերձում նշված է.

«Հարգելի Նիկոլ Վովայի,

Ընդունեք անկեղծ շնորհավորանքներ Ձեր ծննդյան օրվա առիթով:

Ռուս-հայկական հարաբերությունները հիմնված են բարեկամության և փոխադարձ հարգանքի դարավոր ավանդույթների վրա։ Մենք կողմ ենք, որպեսզի այս հարաբերությունները շարունակեն հաջողությամբ զարգանալ՝ ի շահ երկու երկրների ժողովուրդների։

Մաղթում եմ Ձեզ առողջություն, երջանկություն, բարեկեցություն և հաջողություններ Ձեր պետական գործունեության մեջ»։

Փաշինյանն ու Պուտինը նաև հեռախոսազրույց են ունեցել։

«Վարչապետ Փաշինյանը ՌԴ նախագահին շնորհակալություն է հայտնել շնորհավորանքի և բարեմաղթանքների, ինչպես նաև ս/թ մայիսի 25-26-ին տեղի ունեցած ջրհեղեղի հետևանքով Լոռու մարզում ավերված երկաթուղային հատվածները հնարավորինս արագ վերականգնելու՝ Ռուսական երկաթուղիներին տրված հանձնարարականի համար»,- ասված է պաշտոնական հաղորդագրությունում:

Վարչապետին շնորհավորական ուղերձներ են հղել նաև ՌԴ կառավարության նախագահ Միխայիլ Միշուստինը, Ղազախստանի նախագահ Կասիմ-Ժոմարտ Տոկաևը, Ղազախստանի վարչապետ Օլժաս Բեկտենովը և Ուզբեկստանի Հանրապետության նախագահ Շավքաթ Միրզիյոևը։

Լուսանկարը՝ արխիվային