Բաքվի և Երևանի միջև խաղաղության պայմանագիրը կվերափոխի Հարավային Կովկասն ու արմատապես կփոխի Ադրբեջանի դերը տարածաշրջանում։ Այդ մասին APA գործակալության փոխանցմամբ նշվում է ԱՄՆ նախագահ Ջո Բայդենի՝ Բաքվի էներգետիկ շաբաթվա մասնակիցներին ուղղված ուղերձում, որն ընթերցել է ԱՄՆ Պետքարտուղարության էներգետիկ ռեսուրսների բյուրոյի բազմակողմ էներգետիկ դիվանագիտության գծով ավագ խորհրդական Հարի Քեմիանը։

Բայդենի ուղերձում նշվում է, որ տարածաշրջանային կայունությունն ու փոխկապակցվածությունն ԱՄՆ-ի համար առաջնահերթություններ են:

«Երկարաժամկետ խաղաղության պայմանագիրը վերջ կդնի բազմամյա հակամարտությանը, կվերափոխի Հարավային Կովկասը և արմատապես կփոխի Ադրբեջանի դերը տարածաշրջանում: ԱՄՆ-ն պատրաստ է աջակցել այդ ձգտմանը։ Մենք պարտավոր ենք ապագա սերունդներին ապահովել, որ խաղաղությունն ու բարգավաճումը մնան մեր առաջնորդող սկզբունքները»,- ասված է ուղերձում։

Բայդենը նաև ընդգծել է, որ Ադրբեջանը «մնում է գլոբալ էներգետիկ անվտանգության կարևոր հենարան` հատկապես Եվրոպայի համար»։

Լուսանկարը՝ Andrew Harnik/AP