Այսօր հերթական միջադեպն է գրանցվել Արմավիրի մարզում, ինչին ներգրավված է ԱԺ ՀՀԿ-ական պատգամավոր Նահապետ Գեւորգյանի որդին` Արտակ Գեւորգյանը: Այս պահին ոստիկանության Արմավիրի վարչությունում վարչության պետ Արամ Զաքարյանի գլխավորությամբ խորհրդակցություն է: «Հետքի» տեղեկություններով՝ խորհրդակցությունը կապված է նշված դեպքի հետ:

Քիչ առաջ ոստիկանությունը հաղորդագրություն է տարածել, սակայն նշված չէ, որ միջադեպը տեղի է ունեցել պատգամավորի որդու մասնակցությամբ:

Ըստ հաղորդագրության, այսօր ժամը 03.35-ին ոոստիկանության Երեւան քաղաքի վարչությունից  Արմավիրի բաժնում հաղորդում է ստացվել, որ  իրենց է զանգահարել 1987 թ. ծնված Վիրաբ Ա.-ն եւ հայտնել, որ անհայտ անձը «ԳԱԶ 24»  մակնիշի ավտոմեքենայից իջնելով՝ զենքի սպառնալիքով առեւանգել է իր «ՎԱԶ 2106»  մակնիշի ավտոմեքենան:

Մեկնած օպերատիվ խումբը պարզել է, որ 1982 թ. ծնված Արտակ Գ.-ն նույն օրը, ժամը 03.30-ի սահմաններում, Արմավիրի մարզի Սարդարապատ գյուղի դպրոցի մոտ իջնելով իր կողմից վարած «ԳԱԶ 24» մակնիշի ավտոմեքենայից՝ ատրճանակի սպառնալիքով կանգնեցրել է Վիրաբ Ա.-ի կողմից վարվող «ՎԱԶ 2106»  մակնիշի ավտոմեքենան եւ իջեցնելով վերջինիս ու նրա ուղեւորին ու թողնելով «ԳԱԶ 24» մակնիշի ավտոմեքենան` «ՎԱԶ 2106» ավտոմեքենայով հեռացել է:

Փաստով ոստիկանության Արմավիրի մարզային քննչական բաժնում հարուցվել է քրեական գործ` ՀՀ քրեական օրենսգրքի 183 հոդվածի 1-ին  մասի, 183 հոդվածի 3-րդ մասի 3-րդ կետի և 235 հոդվածի 1-ին մասի հատկանիշներով:

Արտակ Գեւորգյանը ձերբակալված է:

Մեր տեղեկություններով՝ դեպքը դեղի է ունեցել պատգամավորին պատկանող գազալցակայանի մոտակայքում: Արտակ Գեւորգյանը ցանկացել է լիցքավորել իր ավտոմեքենան, սակայն չի համբերել իր հերթին եւ որոշել է դիմել այդ քայլին:

Նշենք, որ Նահապետ Գեւորգյանի որդին Արմավիրի մարզում միշտ աչքի է ընկել իր հակահասարակական եւ հակաօրինական վարքագծով, սակայն միշտ ջրից չոր է դուրս եկել: Նրա մասնակցությամբ այս տարվա ապրիլի 6-ին առեւանգվեց եւ դաժան ծեծի ենթարկվեց Արմավիրի մարզի թիվ 21 ընտրատարածքի պատգամավորության թեկնածու Մերուժան Մխոյանը, էլ չենք խոսում մայիսի 6-ի խորհրդարանական ընտրությունների ժամանակ Արտակ Գեւորգյանի պահվածքի մասին, որն «աննկատ» էր մնում ոստիկանների աչքին: