ՌԴ կառավարության ղեկավարի տեղակալ Ալեքսեյ Օվերչուկը Ադրբեջանի փոխարչապետ Շահին Մուստաֆաևի հետ քննարկել է միջկառավարական հանձնաժողովի նիստի նախապատրաստական աշխատանքները: ՌԴ կառավարության մամուլի ծառայության փոխանցմամբ՝ հանդիպումը տեղի է ունեցել Պետերբուրգի միջազգային տնտեսական համաժողովի շրջանակում։ 

«Տեղի է ունեցել մտքերի շահագրգիռ փոխանակում տնտեսության տարբեր ճյուղերում առկա իրավիճակի և համատեղ ծրագրերի իրականացման հեռանկարների շուրջ: Համանախագահները հատուկ ուշադրություն են դարձրել Ռուսաստանի Դաշնության և Ադրբեջանի Հանրապետության միջև տնտեսական համագործակցության միջկառավարական հանձնաժողովի առաջիկա նիստի օրակարգի հիմնական հարցերին»,- ասված է հաղորդագրության մեջ։

Կողմերը քննարկել են նաև երկկողմ առևտրատնտեսական համագործակցության արդիական հարցեր, որոնք ընդգրկված են ՌԴ-ի և Ադրբեջանի միջև տնտեսական համագործակցության միջկառավարական հանձնաժողովի գործունեության օրակարգում:

Թե արդյոք հանդիպման ընթացքում քննարկվել է Հարավային Կովկասում տրանսպորտային և հաղորդակցային ենթակառուցվածքների ապաշրջափակման հարցը, ռուսական կողմը չի մանրամասնել։

Լուսանկարը՝ Azertac-ի