Թերթն արդեն տեղեկացրել էր, որ Երևանի քաղաքապետարանը Նորագավիթ թաղամասին հարող տարածքում 10,0 հա մակերեսով հողամաս է հատկացրել ֆուտբոլի մարզադաշտ կառուցելու նպատակով: Բնակիչները բազմիցս բողոքել են, որ իրենց պտղատու այգիները կանգնած են ոչնչացման վտանգի առջև: Եվ ահա երեկ ՀՖՖ մամլո խոսնակ Արայիկ Մանուկյանը թերթին հայտնել է, որ իրենք հրաժարվել են այնտեղ մարզադաշտ կառուցելու գաղափարից:

«Այո, հատկացրել էին, բայց Ռուբեն Հայրապետյանը հրաժարվել է այդ տարածքից, որովհետև այդտեղ կան բազմաթիվ պտղատու ծառեր: Ինչպե՞ս կարող ենք այդ ծառերը կտրել: Անմշակ հողատարածք տրամադրելու դեպքում պատրաստ ենք մարզադաշտ կառուցել»,- նշել է նա: 

Իսկ թե ինչու է Երևանի քաղաքապետ Տարոն Մարգարյանն այդպիսի «կույր» որոշում կայացրել` մարզադաշտի համար հատկացնելով պտղատու ծառերով հագեցած հողակտոր, այդպես էլ անհասկանալի է մնում: