«Եվրո-2024»-ում այսօր մեկնարկեց խմբային փուլի երկրորդ տուրը, և օրվա առաջին խաղում Խորվաթիայի և Ալբանիայի հավաքականները 2։2 հաշվով մարտական ոչ-ոքի խաղացին։ Հանդիպումը տեղի ունեցավ Համբուրգի «Ֆոլկշպարկշտադիոն» մարզադաշտում։

Հանդիպման հաշիվը բացվեց 11-րդ րոպեին․ աչքի ընկավ Ալբանիայի հավաքականի կիսապաշտպան Քազիմ Լաչին։ Այս հաշիվը պահպանվեց ավելի քան մեկ ժամ։ Այնուհետև երկու րոպեների ընթացքում խորվաթները կարողացան երկու գնդակ խփել․ նախ 74-րդ րոպեին Անդրե Կրամարիչը հավասարեցրեց հաշիվը, ապա 76-րդ րոպեին՝ Կլաուս Գյասուլան դարձավ ինքնագոլի հեղինակ։ Եվ երբ թվում էր, թե հանդիպումը հենց այս հաշվով էլ կավարտվի, նույն Կլաուս Գյասուլան 95-րդ րոպեին գրավեց խորվաթների դարպասը՝ փրկելով Ալբանիային պարտությունից։

Հիշեցնենք՝ առաջին տուրում B խմբում ընդգրկված այս երկու թիմերն էլ պարտություն էին կրել․ Խորվաթիան 0։3 հաշվով Իսպանիայից, իսկ Ալբանիան՝ 1։2 հաշվով Իտալիայից։ Իսպանիայի ու Իտալիայի հանդիպումը տեղի կունենա հունիսի 20-ին։

Իսկ այսօր կկայանան նաև A խմբի հանդիպումները․ առաջնությունը հյուրընկալող Գերմանիայի հավաքականը կխաղա Հունգարիայի, իսկ Շոտլանդիան՝ Շվեյցարիայի հետ։