Պատասխանելով «Արմենպրես» լրատվական գործակալության հարցին՝ ՀՀ արտգործնախարար Էդվարդ Նալբանդյանն ասել է.

«Հուլիսի 19-ին Լեռնային Ղարաբաղում կայացած  ազատ, արդար եւ մրցակցային  նախագահի ընտրությունը վկայում է Արցախի իշխանությունների և ժողովրդի հավատարմությունը ժողովրդավարությանն ու օրենքի գերակայությանը: 

Ողջունելի է ընտրությանը մի քանի տասնյակ միջազգային դիտորդների ներկայությունը, որոնց գնահատմամբ  ընտրություններն անցել են կազմակերպված, թափանցիկ, միջազգային չափանիշներին համապատասխան:

Չեմ կարծում, որ ժողովրդավար որեւէ երկրի կողմից կարող է վիճարկվել ժողովրդավարական ընտրությունների միջոցով իշխանությունների ձեւավորման անհրաժեշտությունը եւ կարեւորությունը:

Միջազգային հանրությունը, բնականաբար, պետք է շահագրգռված լինի հարաբերվելու Լեռնային Ղարաբաղի ժողովրդի կողմից ընտրված իշխանությունների հետ, առավելեւս, որ դա նախատեսված է ԵԱՀԿ Մինսկի համաժողովի անցկացման մանդատով:

Այս ընտրությունով Արցախի ժողովուրդը հերթական անգամ ապացուցեց ժողովրդավարական ճանապարհով իր ճակատագիրը տնօրինելու վճռականությունը: